Байден Оросыг Украйн руу дайрах огноог зарлажээ

АНУ-ын Ерөнхийлөгч Жо Байден ОХУ-ыг энэ сарын 16-нд Украйн руу дайрах гэж байгаа тухай холбоотнууддаа мэдэгдсэнийг “Politico” сонинд эх сурвалж нь мэдээлсэн байна. Байден нь Европын холбоо, НАТО, Канад, Франц, Герман, Итали, Их Британи, Польш, Румыны өндөр албан тушаалтнууд оролцсон онлайн хэлэлцээний үеэр энэхүү мэдээллийг хүргэжээ. “Politico” сонины тайлбарлаж байгаагаар Байден нь тагнуулын албадынхаа өгсөн маш нууц мэдээлэл дээр үндэслэн ийм мэдэгдэл хийсэн юм байна. Ингээд зогсохгүй Оросыг дайралт эхлэхийн өмнө Украйны чухал объектуудад пуужингаар цохилт өгөхтэй зэрэгцээд кибер дайралт хийнэ гэж холбоотнууддаа анхааруулжээ.

Гэвч өрнөдийн өндөр албан тушаалтнууд, сонин хэвлэлүүд бүр өнгөрсөн оны арваннэгдүгээр сараас эхлэн Орос дайн эхлүүлэх өдрийг хоорондоо уралдан сүр дуулиантай зарласаар байгаад түүнд нь олон нийт төдийгүй өөрсдөө ч итгэхээ байж байгаа бололтой. Учир нь, дэлхийн №1 тагнуулын албатай, хамгийн хүчирхэг гүрний удирдагчийн хэлсэн үгэнд итгэхгүй байгаа гэдгээ Европын хоёр ч орны төлөөлөгч “Politico” сонинд хэлсэн байна. АНУ-ын хамгийн үнэн түнш Их Британийн төлөөлөгч хүртэл тагнуулын мэдээг арай өөрөөр тайлбарлаж байгаа гэдгээ тус сонинд хэлжээ.

Үүний өмнө Оросын дайралт хоёрдугаар сарын 16-нд эхлэх тухай нууц эх сурвалжууд нь мэдээлснийг Германы “Der Spiegel” сонин мэдээлээд байсан. Мөн “Bloomberg” агентлагийн эх сурвалжууд нь Орос хоёрдугаар сарын 15-нд Украйн руу дайрна гэж хэлснийг тус сайт мэдээлсэн.

 Тэгвэл АНУ-ын Аюулгүй байдлын зөвлөх Жейк Салливан нь Оросууд Олимпын тоглолт дуусахаас өмнө буюу хоёрдугаар сарын 20-оос өмнө дайрахаар бэлдсэн гэж мэдэгдсэн. Ингэхдээ Саллвиван нь Оросууд агаараас Киев хотыг бөмбөгдөж дайралтаа эхлүүлж магадгүй гэж онцолж байсан юм.

Энэ мэтээр АНУ, Их Британи гэсэн улсууд ОХУ-ыг Украйн руу дайрч, өөрийнхөө эсрэг эдийн засаг, санхүү, улс төрийн урд хожид үзэгдээгүй хатуу хориг арга хэмжээ авах боломж гаргаж өгөхийг тэсэн ядан хүлээж, тэвчиж ядахдаа Путины өмнөөс шийдвэр гарган тааруухан зурхайч шиг янз бүрийн таамаг дэвшүүлж, хөөрхий украйнчуудыг айлгасаар байна.