УИХ-ын гишүүн Ч.Ундрамын хамаарал бүхий компани Хөгжлийн банкинд зээлийн зөрчил үүсгэжээ

Хөгжлийн банкнаас зарласан зээлийн зөрчил үүсгэсэн компаниудын нэг нь Сэлэнгэ аймгаас сонгогдсон УИХ-ын гишүүн Ч.Ундрамтай холбогдож байна. Түүний аав Ч.Чинбат нь уул уурхайн чиглэлийн бизнестэй холбогддог эрхэм. Тэгвэл энэ удаа Хөгжлийн банкнаас “Вояжерминерал ресурсес” ХХК-аараа 2018 онд 414 сая иен буюу ойролцоогоор 10 тэрбум төгрөгийн зээл авсан байна. Өнөөдрийн байдлаар зээлийн үлдэгдэл 3.6 тэрбум төгрөгтэй тэнцэх иен бөгөөд зээлийн төлөлтийн явцад зөрчил үүсгээд байгааг Хөгжлийн банкнаас нээлттэй зарласан юм.

Ч.Ундрамын аавыг Өсөх зоос ХХК-ийн эзэн, тэрбумтан гэдгээр нь мэдэх хүн олон бий. Хөлтэй бизнесмэнүүдийн нэг гэгдэх Ч.Чинбат ч Хөгжлийн банкийг тойролгүй зээл авч, эргэн төлөлт дээрээ луу унжиж байгаа нь энэ юм. Эндээс харахад Хөгжлийн банкны зээлд хэн мөнгөтэй, эрх мэдэлтэй нь хүрч, эргэж төлөхдөө алдаршитлаа нэхүүлэх учиртай харагдана.

Хөгжлийн банк дахь эргэн төлөлтийн төлбөрийн зөрчил үүсгэсэн зээлдэгчдийн жагсаалтыг МАК тэргүүтэй 10 компани удаалж байгаа бөгөөд зөрчил үүсгэсэн зээлдэгчдийн нийт зээлийн үлдэгдэл 836 тэрбум төгрөгтэй тэнцэж байна.