ТӨСВИЙГ МӨШГӨЕ: Эрэлийн Б.Эрдэнэбат Хөгжлийн Банк, Хаан банк, Хас банкинд нийлээд 300 гаруй тэрбум төгрөгийн өртэй

Залилан, мөнгө угаасан гэх үйлдлүүдэд буруутгагдаг Эрэлийн Д.Эрдэнэбатын луйвар Хөгжлийн банкийг тойрсонгүй. Бадарчийн Эрдэнэбат, түүний эхнэр Даваахүүгийн Сэргэлэн нар Монгол улсын Хөгжлийн банкнаас авсан зээлүүдийг танилцуулъя.

Зээлийн барьцаанд төслийн үр дүнд ирээдүйд бий болох хөрөнгө, дансны авлага, борлуулалтын орлого, Хөгжлийн банкин дахь данснууд дах мөнгөн хөрөнгө, Эрэл ХХК-ийн Төрийн банк дах төгрөгийн 106000026462, 106000026470 тоот дансыг барьцаалжээ. Ёстой нэг, УИХ-ын гишүүн Г.Амартүвшингийн хэлдэг “Би арилжааны банкны захирал байсан бол олгохооргүй зээл, барьцаа хөрөнгүүд байсан” гэдэг л болж байна. 100 сая төгрөгийн байр авчихаад түүнийгээ 30 жил барьцаалж өрөө төлдөг иргэдэд Эрэлийн Эрдэнэбатын Хөгжлийн банкинд тавьсан барьцаа юу болж сонсогдох нь ойлгомжтой. “ҮЛГЭР”-т хүүхдүүд л итгэдэг байтал Хөгжлийн банкны захирлаар ажиллаж байсан Н.Мөнхбат ч итгээд, Эрэлийн Б.Эрдэнэбатаас ирээдүйд бий болох хөрөнгийг нь хүлээгээд сууж байжээ.

Өнөөдөр Эрэлийн Эрдэнэбатын Хөгжлийн банкинд төлөх өрийн хэмжээ 163.1 тэрбум. Хэзээ хэрхэн төлөх нь тодорхойгүй.

Цагтаа Номин холдинг ХХК-ийн Ш.Баярсайханы толгойг эргүүлж, хөрөнгийн маргаан үүсгэж явсан. Хан-Уул дүүргийн Эрүүгийн хэргийн анхан шатны шүүхээс Б.Эрдэнэбатад бусдыг залилсан үйлдэлд нь тав, мөнгө угаасан хэрэгт нь хоёр жил, нийт долоон жил хорих ял оноож, эхнэр Д.Сэргэлэнг нь цагаатгаж байсан түүхтэй. Д.Эрдэнэбатыг Ш.Баярсайханаас 20 тэрбум төгрөг залилсан гэж үзэж 20 тэрбум 6 сая 375 мянган төгрөгийг гаргуулж хохирогч Ш.Баярсайханд олгуулахаар шүүхээс шийдвэрлэж байсан юм. Харин Нийслэлийн Эрүүгийн хэргийн давж заалдах шатны шүүх хэргийг 2020 оны 12 дугаар сарын 15-ны өдөр хянан хэлэлцээд анхан шатны шүүхийн шийтгэх тогтоолыг хүчингүй болгож, мөрдөн шалгах ажиллагааны явцад Эрүүгийн хэрэг хянан шийдвэрлэх тухай хуулийн 16.2 дугаар зүйлд заасан нотолбол зохих байдлаас заримыг нь шалгаж тогтоогоогүй гэсэн үндэслэлээр хэргийг прокурорт буцааж шийдвэрлэжээ. 

Яаж ийгээд өрөө төлөхгүй, яаж ийгээд ялаас мултарчихдаг Д.Эрдэнэбатын луйвар ингээд зогсохгүй. Тэрээр “Хаан банк, Хас банк, Хөгжлийн банкинд нийлээд 300 гаруй тэрбум төгрөгийн өртэй” болохыг Ариг банкин дахь Хадгаламж эзэмшигчдийн холбооныхон зарлаж байсан удаатай.