Оросын хөрөнгө оруулалт их байна гэж дургүйцжээ

АНУ-ын Төрийн департамент Их Британийн Засгийн газрыг эдийн засагтаа Оросын хөрөнгө оруулалтыг багасгах эрс шийдэмгий арга хэмжээ авахгүй байна гэж дургүйцэл илэрхийлсэн тухай “The Times”  сонин мэдээлжээ.

Кремльтэй ямар нэг байдлаар холбоотой гэгддэг Оросын олон арван тэрбумтан, олигархууд Лондонд үл хөдлөх хөрөнгө худалдан авч ая тухтай амьдарч байгаа нь Оросыг Украйн руу дайрсан нөхцөлд Путин ба түүний ойрын хүрээний хүмүүсийн эсрэг авах хориг арга хэмжээний үр дүнг ихээхэн бууруулна гэж АНУ-д үзэж байгаа юм байна.

Оросын тэрбумтнууд, олигархуудаас гадна эрх мэдлээ хэтрүүлэн ашиглаж асар их мөнгө завшсан эсвэл асар их авлига авсан өндөр албан тушаалтан асан хүмүүс Оросын татвар, тусгай албадаас зугтаж, өөрсдийгөө Путины эсрэг тэмцэгч, сөрөг хүчний хүн гэж зарлаад Лондонд суурьшдаг бараг уламжлал тогтсон гэж болно. Их Британийн Засгийн газар Путины эсрэг тэмцэгч, сөрөг хүчнийг дэмжигч гэсэн хүмүүсийг хэзээ ч баривчилж, буцаадаггүй.