ТӨСВИЙГ МӨШГӨЕ: ​Хөгжлийн банкны чанаргүй зээлдэгч Чингис хаан банк Сангийн сайд Б.Жавхлантай халаас нэгтэй

Дампуурлаа зарлах дараагийн банк гэгдээд байгаа Чингис хаан банк 2014 онд Хөгжлийн банкнаас 13 тэрбум төгрөгийн зээл авч, зээлийн үлдэгдэл болох 1.1 тэрбум төгрөгийг төлөөгүй 2 жил гаруй хугацаа өнгөрчээ. Арьс шир боловсруулах үйлдвэрлэлийн төсөл хэрэгжүүлэхээр анх зээл авч байсан байна.

Тэгвэл Хөгжлийн банкны найдваргүй зээлдэгч “Чингис хаан” банкны цаана Барилга, хот байгуулалтын дэд сайд асан Ш.Лхамсүрэнгийн эгч Ш.Бүтэд байгааг баримтаар харуулъя. Тодруулбал, Чингис хаан банкны хувьцаа эзэмшигч “Нью стандарт финанс” ХХК-ийн Гүйцэтгэх захирал нь Шүхэртийн Бүтэд юм. Овог нэгт төрсөн эгч дүүс Мондулаан трейд ХХК-аар дамжуулан Хөгжлийн банкнаас их хэмжээний зээл авч, найдваргүй зээлдэгчдийн жагсаалтад орсныг бид өмнө нь мэдээлсэн. Гавьяат эдийн засагч, банкир Б.Шүхэртийн охид хөвгүүд бүгд л томоохон мөнгөний асуудалтай холбогдож яваа нь энэ. Басхүү үүний цаана нөлөө бүхий улс төрч холбогдож байгааг өмнөх цувралд дурдсан.

Дашрамд дурдахад ЖДҮХС-аас зээл авч, иргэдийн боломжийг хулгайлсан улс төрч, төрийн өндөр албан тушаалтнуудын жагсаалтыг Барилга, хот байгуулалтын дэд сайд асан Шүхэртийн Лхамсүрэн үргэлжлүүлж байсан билээ. Дээрх шалтгаанаар албан тушаалаа хүртэл өгч байсан юм.

Н.Өнөрцэцэг