ДЭМБ баяр ёслолоос татгалзахыг уриалав

ДЭМБ-аас асар хурдацтай тархаж байгаа омикрон хувилбараас сэргийлэхийн тулд Зул сар, Шинэ жилийн баярыг олуул цуглаж тэмдэглэхээс татгалзахыг уриалсан байна.

 ДЭМБ-ын тэргүүн Тедрос Адханом Гебрейесус нь Женев хотноо хэвлэл мэдээллийнхэнтэй уулзахдаа “Баяр ёслолоос татгалзах нь амьдралаа алдаж байснаас дээр. Өнөөдөр наргиж цэнгэчхээд дараа нь гашуудаж байхын оронд яг одоо баяр тэмдэглэхээс татгалзаад, дараа нь тэмдэглэе гэх нь илүү зөв” гэсэн байна.

 Омикрон хувилбар корона вирусийн бусад хувилбаруудаас хамаагүй илүү халдвартай, вакцин хийлгэсэн болон өвдөөд дархлаа тогтсон хүмүүсийг хүртэл өвчлүүлж байгаа гэдгийг ДЭМБ-ын тэргүүн онцолсон байна. Тэрээр энэ талаар ярихдаа “Омикрон хувилбар нь Дельта хувилбараас хавьгүй хурдан тархдаг гэдгийг нотлох хангалттай баримт цуглаад бөгөөд төдийгүй вакцин хийлгэсэн эсвэл өвдөөд дархлаа тогтсон хүмүүс ахин өвдөх магадлал өндөр байна” гэжээ.

 Түүнчлэн энэ жил Covid-19-өөр нас барсан хүний тоо 2020 онд ДОХ, халуун хумхаа, сүрьеэ өвчнөөр нийт нас барсан хүний тооноос давж гараад байгааг ДЭМБ-ын тэргүүн мэдэгджээ.