ӨНӨӨДӨР ДЭЛХИЙ НИЙТЭЭР ТАМХИ ТАТДАГГҮЙ ӨДӨР

Өнөөдөр дэлхий нийтээрээ тамхи татдаггүй өдөр. Энэ өдрийг анх 1988 оны тавдугаар сарын 31-ний өдрөөс эхлэн Дэлхийн эрүүл мэндийн байгууллагаас уриалж тэмдэглэж эхэлжээ. Түүнээс хойш дэлхий даяар "Тамхины эсрэг өдөр" хэмээн нэрийдэх болсон. Манай улсын хувьд УИХ-ын гишүүн асан Л.Эрдэнэчимэг тамхины тухай хуулийг анх санаачилан, олон нийтийн газар болон ажлын байранд тамхи татах мөн сургууль цэцэрлэгээс нэг километр газарт тамхи зарах, ширхэгээр зарахыг хориглосон. "Монголын хууль гурав хоног" гэгчээр нэг хэсэгтээ л гудамж талбайгаар тамхи татах иргэд цөөрсөн ч нөгөө л хугацааны дараа буцаад л хэвэндээ орсон. Захын жижиг түцнээс та ширхэгээр авч болох. Замын хөдөлгөөнд оролцож байгаад сургуулийн ойролцоох дэлгүүрээс өнөөх тамхиа авах жишээтэй. Хороо, дүүргийн Цагдаагийн газраас хяналт шалгалтыг явуулдаг ч тэдгээр худалдааны байгууллагууд зарж байгаа тамхиа хураалгаад 50 мянган төгрөгөөр торгуулаад л өнгөрнө. Маргааш нь нөгөө тамхиа ахиад л зарна.

Тамхи хүний биеийн төв мэдрэлийн системд хүчтэй нөлөөлдөг. Тамхины утааг сороход никотин нь уушигны цусаар дамжин 7 секунт ч хүрэхгүй хугацаанд тархи болон бусад амин чухал эрхтэнүүдэд хүрдэг. Тамхи татсанаар таны шүд шарлаж унах, шүд сулрах, буйл үрэвсэх гээд энгийн өвчлөлүүд илэрнэ. Бүр цаашлаад нүд хорсох, нулимс гоожих, цээж хиржигнэх, дархлалын тогтолцоо гэмтэх гээд маш олон хүндрэлт өвлөлүүд үүсдэг гэдгийг эмч нар анхааруулсаар байгаа. Харин энэхүү хорт зуршлаа хаяснаар таны амьсгалын замын өвчлөл эрс буурна, зүрхний шигдээс 50 хувь буурна, гоо сайхан сэргэнэ гээд маш олон өвчнөөс сэргийлнэ. Иймд та өөрийн болоод бусдын эрүүл мэндийн төлөө хорт зуршлаа бага дээр нь орхиорой.