Т.Мөнхсайханаас шууд асууя: Нэг ширхэг маскийг 20 000 төгрөгөөр худалдан авахдаа таны сэтгэл эмтрээгүй юу?

“Энхийн шүүдэр” ХХК эмнэлгийн ажилчдын хэрэгцээний 17.5:9,5 N95 маскийг БНХАУ-аас 0.5 cent буюу 1424 төгрөгөөр хилээр оруулж ирсэн.

Харин өнгөрсөн оны 11 сарын 11-нд ЭМЯ-нд нэг ширхэгийг нь 20 000 төгрөгөөр бодож 150 000 орчим ширхэгийг 2,9 тэрбум төгрөгөөр нийлүүлсэн байгаа юм.Тухайн үед N95 маскийг 8-10 000 төгрөгөөр нийлүүлэх саналыг компаниуд тавьсан байдаг. Тухайн үед Т.Мөнхсайхан Эрүүл мэндийн сайдаар ажиллаж байсан. Түүнээс энэ асуудлаар шууд тодрууллаа.

Ерөнхийлөгч У.Хүрэлсүхийн зөвлөх Т.Мөнхсайхан: Тухайн үед ковидын халдвар гараад дөнгөж эхэлж байсан үе гэж ойлгож байна. Сайд нь худалдан авалт зохион байгуулдаг уу,  үгүй юу гэдэг чинь тусдаа асуудал. Тэрэнд сайдын хувьд оролцоотой асуудал байдаггүй. Гарын үсэг зурж үүнийг худалдаж ав, үүнийг хий гэсэн зүйл байдаггүй. N95 маск дотроо маш олон янз. Тэр маск бусад энгийн маскнаас үнэтэй байдаг. Тухайн үед N95 маск дэлхий даяар хомсдчихсон байсан үе. ЭМ-ийн байгууллагад N95 маск хэрэглэж байхад энэ маск ховордож, үнэ нь өссөн байж магадгүй. Сайдын хувьд хяналт тавьж, зах зээлийн үнээс өндөр байвал мэдээж хяналт тавина. Ийм асуудлыг Төрийн нарийн шийддэг асуудал, яагаад 20 мянгаар авсан вэ гэдэг нь тэдний шийдсэн шийдвэрийн асуудал.