Австрид вакцин хийлгээгүй хүмүүсийг торгоно

Австри нь COVID-19-ийн эдийн засаг, нийгэмд үзүүлж байгаа сөрөг нөлөөг багасгах үүднээс хүн амыг заавал вакцинжуулах хууль батлах гэж байгаа тухай “Die Presse” мэдээлсэн байна. Хуулийн төслийг дараа долоо хоногоос парламентад хэлэлцэж эхлэх ч сэтгүүлчдэд одооноос танилцуулан хэлэлцүүлгийг эхлүүлж байгаа юм байна. Энэ хуулийг парламент баталсан тохиолдолд корона вирусийн эсрэг вакцин хийлгэхээс татгалзсан хүнийг 3600 еврогийн торгууль ногдуулдаг болно. Харин энэ торгуулийг төлөхөөс татгалзвал шууд дөрвөн сар цагдан хорих заалттай. Мөн вакцин хийлгэхээс удаа дараалан татгалзсан “архаг”-уудад шууд 7200 еврогийн торгууль ногдуулж байхаар болжээ.

 Шинэ хууль нь дараа жилийн хоёрдугаар сараас хэрэгжиж эхлэх юм байна. Заавал вакцинжуулах хуулийн дагуу Австри улсад амьдарч байгаа хөл хүнд, 12 хүртэлх насны хүүхдүүд, эмнэлгийн заалтаар вакцин хийлгэх хориотой хүмүүсээс бусад нь заавал корона вирусийн эсрэг вакцин хийлгэх ёстой болно.