​ Японд омикроны анхны тохиолдол бүртгэгдлээ

Коронавирусийн шинэ хувилбар болох омикроноор өвдсөн анхны тохиолдол Японд бүртгэгдсэн тухай тус улсын Сайд нарын танхимын Ерөнхий нарийн бичгийн дарга албан ёсоор мэдээлжээ. Сайд нарын танхимын Ерөнхий нарийн бичгийн дарга Хироказу Мацунл нь энэ тухай хэвлэлийн бага хурал дээр ярихдаа “Намиб улсаас Японд ирсэн дундаж насны эрэгтэй хүнийг хил давах үеэр шинжилгээ хийхэд омикрон штамм илэрсэн талаар Японы Эрүүл мэнд, хөдөлмөр ба баялгийн яамнаас бидэнд мэдээллээ. Үүнтэй холбоотойгоор бид халдварыг цаашид тархахаас сэргийлэх үүднээс хилийн чанадаас ирж байгаа хүмүүст тавих хяналтаа чангатгахаар төлөвлөөд байна” гэжээ.

 Япон нь омикрон штамм илэрснээс дараанаас маш хатуу арга хэмжээ авч эхэлсэн. Тухайлбал, өмнө нь бизнесмен, оюутан, техникийн дадлагажигч нарт хил нэвтрэхэд гурван долоо хоногийн турш хөнгөлөлт үзүүлж байснаа шууд зогсоож, бүх улс орны иргэдэд шинэ виз олгохоо түр хугацаагаар бүрэн зогсоосон. Шинэ виз олгохыг сарын хугацаанд зогсоож байгаа бөгөөд энэ хугацаанд мэргэжилтнүүд нь омикроны аюул эрсдэлийн талаар бодит дүгнэлт хийж, зөвлөгөө өгөх ёстой юм байна.

Түүнчлэн Япон нь дэлхийн 23 улсаас ирж байгаа иргэдэд тавих карантины шаардлага чангатгасан. Австри, Австрали, Бельги, Дани, Франц, Герман, Чех, Хонконг болон Канадын Онтарио мужаас ирж байгаа хүмүүсийг тусгайлан гурав хоногийн каратинт байлгасны дараа нэвтрүүлж байхаар болсон. Их Британии, Израил, Итали, Нидерландаас ирсэн хүмүүсийг зургаа хоногийн карантинд байлгасны дараа нэвтрүүлж байхаар болсон. Африкийн улс орнуудаас ирж байгаа хүмүүсийг шууд 10 хоногийн карантинд байлгахаар болжээ.