Л.Оюун-Эрдэнэ: Вакцинд хамрагдах нь эх оронч үзэл баримтлал юм

Монгол Улсын Ерөнхий сайд Л.Оюун-Эрдэнэ МУИС-ийн Номын сангийн хоёрдугаар давхарт байрлах вакцинжуулалтын түр цэгийн үйл ажиллагаатай танилцаж, оюутан, залуусыг нэмэлт тундаа хамрагдахыг уриаллаа.

Тэрбээр "Дельта вирусийн дөрөв дэх давлагаа зарим улс оронд явж байна. Хоёр хөршийн нөхцөл байдал ч амар биш байна. Монгол Улсын хувьд цаг алдалгүй вакцинжуулалт хийсэн учраас өнөөдөр хатуу хөл хориогүй байна. Тиймдээ ч бид хичээлийн шинэ жилээ нээсэн. Халдварын тохиолдол буурч, эмнэлгийн ачаалал тодорхой хэмжээнд багасч байна. Эхний хоёр тун вакцины үйлчлэл багасах үед гуравдугаар тунг хийлгэх нь маш чухал. Үүний үр дүнд бид энгийн амьдралдаа үе шаттайгаар шилжиж байна”Халдварын тохиолдлыг долоо хоногт 20 хувиар бууруулж чадлаа. Эмнэлгийн ачаалал тодорхой хэмжээнд багасч байна. Эхний хоёр тун вакцины үйлчлэл багасах үед гуравдугаар тунг хийлгэх нь маш чухал. Үүний үр дүнд үе шаттайгаар нээж байгаа эдийн засгаа улам тэлж чадна. Цаашлаад халдварын дэглэмийг бууруулж шар түвшин рүү орж чадвал маргаантай байдаг "doublestandart", нийгмийн бухимдлыг алга болгоно. Харамсалтай нь гуравдугаар тунд хамрагдах залуусын идэвх сул байна. Гуравдугаар тун бол зөвхөн эрүүл мэнд бус нийгэм, эдийн засгийн харилцааны чухал нэг хэсэг”гэлээ.

Гадаадад зорчих иргэд сайн дурын үндсэн дээр өргөдөл бичиж, дөрөв дэх тунд хамрагдаж эхэлсэн. Энэ талаар Ерөнхий сайдаас тодруулахад тэрбээр “Дэлхийн эрүүл мэндийн байгууллага цар тахал бидэнтэй урт хугацаанд явах нь тодорхой гэдгийг хэлж байгаа. Тиймээс цаашид жилд нэг удаа вакцин хийлгэдэг, эм бэлдмэл гарвал эмээ уугаад явдаг амьдралын хэв маяг руу шилжих нь. Монгол Улсад халдварын тохиолдол буурах тусам хил хязгаар нээгдэж инфляцтай холбоотой саад бэрхшээлүүд арилна. Аялал жуулчлал нэмэгдэж, эдийн засаг улам тэлж, дэглэмийг сулруулж энгийн амьдралын хэв маягт шилжинэ. Тиймээс гуравдугаар тунд хамрагдах залуусын идэвх маш чухал. Вакцинд хамрагдах нь эх оронч үзэл баримтлал юм. Эх орон болоод бусад хүмүүсийн өмнө хариуцлагатай хандаж байгаа иргэдэд талархал илэрхийлье" гэлээ.

Вакцинжуулалтын түр цэгт өчигдөр 600 гаруй оюутан дархлаажуулалтад  хамрагджээ. Энэ долоо хоногт МУИС, АШУҮИС, ХААИС, ирэх долоо хоногт ШУТИС, МУБИС-д вакцинжуулалтын түр цэг ажиллуулах юм байна. Эдгээр цэгт зөвхөн оюутнууд төдийгүй багш, ажилтан, иргэд ч дархлаажуулалтад хамрагдах боломжтойг албаны төлөөлөл хэллээ. Ерөнхий сайд Л.Оюун-Эрдэнэ дархлаажуулалтад хамрагдсан оюутнуудын төлөөлөлтэй уулзах үеэрээ цар тахал өдрөөс өдөрт буурч байгаа нь ид шид бус вакцины үр дүн. Тиймээс вакциндаа хамрагдах нь та бидний хамтын хариуцлага юм гэдгийг онцлоод “Оюутан, сурагчид маань зөвхөн өөрийн эрүүл мэндийг хамгаалаад зогсохгүй, найзууддаа сурч боловсрох эрхийг, улс орны эдийн засаг, аж ахуйн нэгжүүдийг ажиллах боломжоор хангаж байгаа хэмээн бодож гурав дахь тундаа идэвхтэй хамрагдаарай” гэсэн юм. 18-40 насныхан гуравдугаар тунд хамрагдах идэвх сул байгаа гэсэн судалгаа байсан. Ийм учраас их, дээд сургуулиудад явуулын цэг ажиллууллаа. Вакцинд хамрагдах хувь эрс нэмэгдэж байна гэж Эрүүл мэндийн сайд С.Энхболд хэллээ. Вакцины түр цэгтэй танилцсаны дараагаар Ерөнхий сайд оюутан залуустай уулзаж, ярилцлаа.