ЭМЯ: Өнөөдөр орны хүлээлт гэж байхгүй болсон, халдвараар өвдсөн хүмүүс өдөртөө хэвтэх боломжтой

ЭМЯ-ны Эмнэлгийн тусламж, бодлого хэрэгжилтийн газрын дарга Б.Буянтогтохоос орны хүрэлцээний талаар зарим зүйлийг тодрууллаа.

Тэрбээр "ЭМ-ийн сайдын тушаалаар Ор зохицуулах баг өнгөрсөн есдүгээр сараас хойш ажиллаж байна.Сүүлийн 14 хоног халдварын тархалт буурч эхэлснээр орны очер бүрэн арилсан. Хэвтэх шаардлагатай иргэд тухайн өдрөө л эмнэлэгт хэвтэх боломжтой гэсэн үг. Халдварын ид оргил үед нийслэлд 6700 орчим иргэн хэвтэн эмчлүүлж байсан бол өнөөдрийн байдлаар 4400 хүн хэвтэн эмчлүүлж байна. Ковидын эмчилгээнд ашиглаж байсан 600 орчим орыг өнгөрсөн долоо хоногт буулгасан. Энэ долоо хоногт 700 гаруй ор буулгахаар ажиллаж байна. Цаашид үндсэн тусламж үйлчилгээгээ түлхүү хүргэнэ. Улсын хоёрдугаар эмнэлэг ногоон бүс рүү шилжсэн бол цаашлаад улсын томоохон эмнэлгүүд шат дараатай  ногоон бүс рүү шилжинэ" гэлээ.