Н.Учрал: Сэтгүүл зүйн зорилгоор мэдээлэл цуглуулахад тухайн хүнээс зөвшөөрөл авах шаардлагагүй байхаар төсөлд тусгана

Өнөөдрийн /2021.10.27/ Хууль зүйн байнгын хорооны хуралдаанаар Хүний хувийн мэдээлэл хамгаалах тухай хуулийн төслийн анхны хэлэлцүүлгийг хийж эхэлсэн ч Ардчилсан Намын бүлгээс тав хоногийн завсарлага авснаар уг хуулийн төслийг хэлэлцэх асуудал хойшиллоо.  Хүний хувийн мэдээлэл хамгаалах тухай хуулийн төсөлд хамгийн их анхаарал татаж буй заалт нь 29.2-т “Мэдээллийг мэдээллийн эзний зөвшөөрөлгүйгээр бусад эх сурвалжаас боловсруулж, мэдээллийн эзнийг таньж, тодорхойлохыг хориглоно” гэж заажээ. Ингэснээр мэдэх эрхийн хүрээнд хэвлэлийн байгууллагууд албан тушаалтнуудыг буруутай үйл ажиллагааг олон нийтэд мэдээлэхийн тулд тухайн хүнээс заавал зөвшөөрөл авахаар болж байгаа юм. Тэгвэл уг заалтыг хасах саналыг ажлын хэсгээс гаргажээ. Энэ талаар Хүний хувийн мэдээлэл хамгаалах тухай хуулийн төслийн ажлын хэсгийн ахлагч, УИХ-ын гишүүн Н.Учралаас тодрууллаа. 

Тэрбээр  "Хүний хувийн мэдээлэл хамгаалах тухай хуулийн төсөлд 29.2-т өөрийн зөвшөөрлийн үндсэн дээр гэдэг үгийг ажлын хэсэг дээр хасаад зарчмын зөрүүтэй саналыг хураалгах гэтэл Ардчилсан намын бүлэг завсарлага авсан. Тэгэхээр дараа долоо хоногт хэлэлцэнэ. Ажлын хэсгийн ахлагчийн хувиар УИХ-ын гишүүдийнхээ дунд санал хураалгаад “Сэтгүүл зүйн зорилгоор нийтийн эрх ашгийг хамгаалах үүднээс” гэдэг томъёоллоор явах гэж байна. Өөрийн зөвшөөрлөөр гэдгийг хасчихаар сэтгүүл зүйн зорилгоор мэдээлэл түгээхэд ямар нэгэн асуудал үүсэхгүй. Тодруулбал, сэтгүүл зүйн зорилгоор нийтийн эрх ашгийг хамгаалах үүднээс мэдээлэл цуглуулж, ашиглах нь уг хуульд хамаарахгүй гэж тусгасан. Хувь хүн өөрийн орон зайд ямар нэгэн байдлаар сэтгэгдэл бичих, нийтлэл оруулах нь мөн энэ хуульд хамаарахгүй" гэсэн тайлбарыг тэрбээр өглөө.