СЕХ: Мөнгө тараасан гэх мэдээлэл ирсэн ч хэрэг нээхээс татгалзсан

Сонгуулийн ерөнхий хорооноос УИХ-ын 18, 28 дугаар тойрогт явагдсан нөхөн сонгуулийн нэмэлт санал хураалтын дүнг танилцууллаа.  

Энэ үеэр СЕХ-ны Хууль эрх зүйн газрын дарга Д.Бат-Эрдэнэ Нөхөн сонгуультай холбоотой хэчнээн өргөдөл гомдол ирсэн талаар мэдээлэл өгөв. 

Тэрбээр "Аравдугаар сарын 10-нд болсон УИХ-ын нөхөн сонгууль, аравдугаар сарын 16-нд болсон нэмэлт санал хураалтын үеэр цагдаагийн байгууллагад нийт 62 өргөдөл гомдол ирсэн. Энэ талаар цагдаагийн байгууллагын сонгуультай холбоотой гомдол мэдээллийг хүлээн авах ажлын хэсгээс мэдээлэл авч ажилласан. СЕХ-ны хувьд ямар нэгэн байдлаар сонгуулийн хууль тогтоомж зөрчсөн эсэхийг хянах эрх хуулиар олгогдоогүй. Тухайн асуудлыг Зөрчил шалган шийдвэрлэх хуульд заасны дагуу цагдаагийн байгууллага шалгаж, шүүх тогтооно. Санал, гомдлыг ЦЕГ-т хүргүүлсэн. 

 Өчигдрийн байдлаар 62 өргөдөл гомдлоос нэг нь шийдвэрлэгдэж байгаа бөгөөд бусдыг нь шийдвэрлэж дууссан гэсэн мэдээллийг бидэнд байна. Өргөдөл гомдлын ихэнх нь зурагт самбар  урсан, үрэгдүүлсэн, алга болгосонтой холбоотой байсан. Мөнгө тарааж байна гэсэн дуудлага мэдээллийг хүлээж авсан. Энэ талаарх мэдээллийг шалгаад зөрчлийн хэрэг нээхээс татгалзаж шийдвэрлэсэн мэдээллийг СЕХ-нд ирүүлсэн" гэлээ.