О.Ванданцэрэн: Миний хүү талийгаачийг төрсөн үр шигээ өсгөсөн, би дүүгээ хороочихлоо гэж хэлээд ухаан алдсан

Өнгөрөгч аравдугаар сарын 13-ны оройн 19:00 цагийн орчимд Архангай аймгийн Өндөр-Улаан сумын нутаг Азарга багт 38 настай Д сум алдаж улмаар арван настай хүү Х амь насаа алдсан харамсалтай хэргийн мөрөөр манай сурвалжлах баг тус аймгийг зорьсон юм. Биднийг талийгаач хүүгийн амьдарч буй гэрт очих үеэр талийгаачийн нагац ах нар болон хүүгийн амьдарч байсан хүргэн ахын ар гэрийнхэн бүгд ирсэн байсан юм. Талийгаач арван настай Х нь Өндөр-Улаан сумын  ЕБС-ийн дөрөвдүгээр ангийн сурагч байсан бөгөөд хэрэг гардаг үеэр цахимаар хичээл үзэх ёстой байжээ. Гэвч талийгаач “А, Б” үсгээ таних төдий мэдлэгтэй байсан хэмээн сум алдсан Д-ийн аав О.Ванданцэрэн ярьсан юм. Хүү жижигхэн биетэй, үеийн хүүхдүүдтэй тоглохоос илүүтэй өөрөөс насаар бага хүүхдүүдтэй тоглодог. Морь малаас айдаг, зөөлөн сэтгэлтэй хүү байжээ. Сум алдсан гэх 38 настай Д-тэй талийгаач хүү их дотно байсан бөгөөд ихэнх тохиолдолд хамтдаа явдаг байсан тухай нутгийн иргэд болон талийгаачийн ар гэрийнхэн бидэнд учирласан юм. Хэрэг гарсан тухайн өдөр хүүгийн эмээ Б сумын төвд эмнэлэгт хэвтэж байсан бөгөөд хүүгийн эмээ гурван ч удаа тархиндаа цус харвасан учир ярьж, хэлэхдээ тааруухан аж. Иймд талийгаачийн нагац ах болон худийн зүгээс бидэнд ярилцлага өглөө. Харамсал, гуниг тээсэн сурвалжлагыг үзэгч та бүхэнд хөндөн үзүүлж буй нь галт зэсвэг эзэмшигч хэн бүхэнд сэрэмжүүлэг болгох, мөн олон нийтэд бодит мэдээллийг хүргэхийг зорьсон нь энэ юм.

https://www.facebook.com/zarig...