Ц.Билэгтсайхан: Гурав дахь тунг хийлгэсэн 320 мянган хүний нэг хувь нь халдвар авсан

ХӨСҮТ-ийн захирал Ц.Билэгтсайханаас коронавирусийн нөхцөл байдал болон вакцины гурав дахь тунгийн талаар тодрууллаа. 

Халдварын гурав дахь давалгааг эсэн мэнд, хохирол багатай даван туулахын тулд олон арга хэмжээнүүд яригдаж байна. Эдгээрээс хамгийн чухал нь нэмэлт тун буюу гурав дахь тунг эрчимжүүлэх чиглэл гарлаа. Вакцинжуулалт хийхийн тулд өмнө нь нэгдсэн судалгааг хийдэг. Хоёр тунгийн дараа дархлаа хэр тогтож байна вэ гэдгийг судалсан. Манайд хэрэглэж буй дөрвөн төрлийн вакцинаас хос тунгаа авахад 14 хоногийн дараа эсрэг биеийн түвшин хамгийн өндөр түвшинд очиж байна. Улмаар хугацаа өнгөрөх тусам буурдаг. Дархлааны хариу урвал өрнүүлэх босго утга гэж бий. Тэр босго утга руугаа буурвал дахин дархлааг сэргээх шаардлагатай болно. Энэ үед дархлааг шинээр сэргээх гурав дахь тунг хийх асуудал яригдаж байгаа юм. Гурав дахь тунг өнөөдрийн байдлаар хийлгэсэн 320 мянган хүн байна. Энэ тоог нэмэгдүүлэх төлөвлөгөөг гаргаж байна. Хоёрдахь тунгаа хийлгэсэн 2.1 сая иргэний таван хувь нь буюу 100 мянга гаруй хүн халдвараар өвчилсөн. Вакцины гурав дахь тунгаа хийлгэсэн  320 мянган хүний нэг хувь нь халдвар авсан.Тиймээс гуравдахь тундаа иргэд хамрагдахыг уриаллаа.