Ц.Нямдорж: Сүүлийн үед болж байгаа жагсаалууд сонгуультай цэвэр холбоотой

"Nodoublestandard" хөдөлгөөнийг үүсгэн байгуулсан Д.Монголхүү талбайд жагсаал зохион байгуулж улмаар  өчигдөр СБД-ийн цагдаагийн хэлтсээс түүнийг  гэрээс нь баривчилсан. Үүнтэй холбоотойгоор ЦЕГ-ын дарга, дотоодын цэргийн командлагч, хошууч генерал Ж.Болд тайлбар өгч тэрбээр "Д.Монголхүүд есдүгээр сарын 30-ны өдрийн жагсаалд хайрцагтай эд зүйл оруулахгүй хэмээн цагдаагийн албан хаагч хууль ёсны шаардлага тавьсан. Тухайн хайрцаг дотор гутал байсан гэсэн тайлбарыг өгсөн боловч бид яг гутал байгааг мэдэхгүй. Тиймээс мэдэхгүй эд зүйл нэвтрүүлэхгүй гэсэн. Олон нийт цугласан энэ үед оруулж болдог, болдоггүй зүйл гэж байдаг. Үүний дагуу шаардлага тавихад Д.Монголхүү гэгч хууль ёсны шаарлагыг эсэргүүцэж, цагдаагийн албан хаагчийн биед нь халдсан" гэсэн юм. 

Энэхүү жагсаал,цуглааны талаар ЗГХЭГ-ын дарга Ц.Нямдорж дараах тайлбарыг өглөө. Тэрбээр "Жагсаал цуглааныг энэ хаваржин л хийлээ. УИХ-ын гишүүдээс эхлээд өлсөж цангалаа. Халдвар тархах эрсдэл өндөр байхад ядаж УИХ-ын гишүүд нь цадигтай байж болно оо доо. Би бол маш харамссан. Холбогдох хүмүүст нь ч  би хэлсэн. Зуны найр, наадам гээд л асуудлууд хүндэрсэн. Нөгөө талд  ААН-үүд удаан хугацаанд хөл хорионд байсан учраас бизнес нь зогсчих гээд байна гэдэг шаардлагыг тавьсан. Давхар давхар юм болсон. Сүүлийн үед болж байгаа жагсаалууд сонгуультай цэвэр холбоотой. Ерөнхийлөгчийн сонгуулиар ч гэсэн ингэж л байсан. Одоо нөхөн сонгууль болох гэж байгаа учраас өнөөх уламжлалт аргаа л хэрэглэж байна. Энэ ажлыг хийдэг цөөхөн нэр устай хүмүүс байнга л ингэж байдаг. Улс төр дагасан барьдаг тавьдаг юмнууд олигтой  ч зүйл биш. Би энэ зовлон дунд олон жил амьдарсан.

Өөрсдөө ийм юм хийж байгаа хүмүүс иргэний хувьд дүрэм, журамтай байна гэдгээ боддог байх ёстой. Энэ хүмүүстай харьцаж байгаа цагдаа, тусгай албаныхан бас хэл ам гаргалгүй асуудлаа зохицуулах зэрэг аль аль талаас нь асуудалд зөв хандаж чадахгүй байна л даа. Би тэгж л харж байна. АН цаад талд нь зохион байгуулж, миний хуучин удирдаж байсан яамны гадна сууж байгаад би санаа зовоод л сууж байна. Ер нь бол иргэдийн дунд ийм юм хийдэг цөөхөн хүн бий. Цаана нь улс төрийн нам байдаг. Цар тахалтай энэ хүнд үед ядаж гудамжид үймүүлээд байх үйлдэл гаргамааргүй байгаа юм л даа. Хачин хачин хар юм талбай дээр тавьчихаад сэтгэлзүйн дарамт үзүүлж байна. Энэ хэнд хэрэгтэй юм бэ" гэв.