Өнөөдрийн байдлаар 255 багш, 543 хүүхэд халдвар аваад байна

Бүх шатны боловсролын байгууллагын үйл ажиллагаа эхэлсэн өнгөрсөн 30 хоногийн хугацаанд сургуулийн орчин дахь халдварын нөхцөл байдлын талаар өнөөдөр /2021.09.30/ НОБГ-аас мэдээлэл өглөө. Өнөөдрийн байдлаар цэцэрлэгийн 111 багш, 138 ажилтан, 72 хүүхдээс халдвар илэрсний улмаас таван цэцэрлэг бүрэн, 67 цэцэрлэг хэсэгчлэн цахимд шилжсэн байна.

Мөн сургуулийн 144 багш, 51 ажилтан, 471 хүүхэд халдвар авчээ. Үүний улмаас хоёр сургуулийг бүрэн, 28 сургуулийг хэсэгчилсэн байдлаар цахимд шилжүүлжээ.

Цэцэрлэгийн орчинд дараах тохиолдолд танхимын сургалтыг зогсоож, долоо хоногийн хугацаатай зайн сургалтад шилжинэ. Үүнд:
 
Тухайн нэг бүлгээс халдварын тохиолдол батлагдсан нөхцөлд тухайн бүлгийн
Ангийн байрлалаас хамаарч тухайн давхар, жигүүрийн гурав хүртэл бүлэгт халдварын тохиолдол батлагдсан нөхцөлд тухайн давхар, жигүүрийн бүлгүүдийн
Өөр хоорондоо хамааралгүй (нэг жигүүр, нэг давхар биш, анги болон багш солигддоггүй) гурав ба түүнээс дээш бүлгийн дотор халдварын тохиолдол батлагдсан нөхцөлд цэцэрлэгийн бүх бүлгийн танхимын сургалтыг зогсоож, долоо хоногийн хугацаатай зайн сургалтад шилжүүлнэ.
Ерөнхий боловсролын сургуулийн хувьд коронавируст халдварын тархалтын ногоон болон шар түвшинд байгаа аймаг, сум, тосгон, багт байршилтай сургуулийн хичээлийг танхимаар зохион байгуулна. Халдварын тархалтын улбар шар болон улаан түвшинд байгаа аймаг, нийслэл, сум, дүүрэгт байршилтай сургуулийн суралцагч таван өдөр танхимаар, таван өдөр танхимын бус хэлбэр /зайн/-ээр хичээллэнэ.
 
Дараах тохиолдолд танхимын сургалтыг зогсоож, долоо хоногийн хугацаатай зайн сургалтад шилжинэ. 
 Үүнд:
 Коронавируст халдварын эсрэг вакцинд хамрагдаагүй 12-оос доош насны хүүхэдтэй нэг бүлгээс халдварын тохиолдол батлагдах нөхцөлд тухайн бүлгийн
Коронавируст халдварын эсрэг вакцины бүрэн тунд хамрагдсан 12 ба түүнээс дээш насны хүүхэдтэй нэг бүлгийн гурав ба түүнээс дээш хүүхэд халдвар авсан тохиолдолд тухайн бүлгийн
Өөр хоорондоо хамааралгүй гурав болон түүнээс дээш анги, бүлэгт халдвар бүртгэгдсэн тохиолдолд тухайн давхар, хэсэг /жигүүр/ эсхүл хичээлийн байранд /өвчлөл гарсан анги, бүлгийн байршил болон хичээлийн байраас хамаарч корпусыг хаах/ хичээллэж байгаа анги бүлгийн
Өөр хоорондоо хамааралгүй /нэг жигүүр, нэг давхар биш, анги болон багш солигддоггүй/ гурав ба түүнээс дээш анги, бүлгийн дотор халдварын тохиолдол батлагдсан нөхцөлд сургуулийн танхимын сургалтыг зогсоож, долоо хоногийн хугацаатай зайн сургалтад шилжүүлнэ.