"Малчдын эсрэг гаргасан шийдвэрээ Дундговь аймгийн удирдлагууд эргэж харах шаардлагатай"

Дундговь аймгийн ИТХ-ын Тэргүүлэгчид энэ оны тавдугаар сарын 31-ны өдөр Ашигт малтмал тээвэрлэх замын маршрутад өөрчлөлт оруулах тухай  101 дугаартай тогтоол баталсан. Энэхүү тогтоолоор Дундговь аймгийн нутаг дэвсгэр дээгүүр буюу нийтдээ дөрвөн сумаар дамжин өнгөрөх 300 км орон нутгийн замаар нүүрс тээвэрлэх шинэ зам үүсгэснийг нутгийн иргэд, малчид эсэргүүцэж буй. Аймгийн удирдлагуудын хувьд дээрх тогтоол нь  2017 оны тогтоолын нэмэлт, өөрчлөлт гэж хэлж байгаа ч 2017 оны 09 дугаартай тогтоол зөвхөн Дундговь аймгийн нутаг дэвсгэрээс олборлолт хийсэн уурхайн бүтээгдэхүүнийг тээвэрлэх замын маршрут тогтоосон тогтоол юм.

 Мөн үүнээс гадна 2020 оны 92 дугаартай тогтоолоор  Дундговийн нутгаар дамжин өнгөрөх буюу Тавантолгойн орд газраас нүүрс тээвэрлэлтийг зөвхөн ЗТХ-ийн сайдын 2019 оны 134 дугаартай тогтоолоор баталсан улсын чанартай авто замаар л тээвэрлэлт хийж болно. Бусад орон нутгийн чанартай авто замаар тээвэрлэлт хийхийг хориглосон тогтоол гаргаж байжээ. Энэ тогтоол нь одоо ч хүчин төгөлдөр хэвээр байтал энэ оны тавдугаар сарын 31-ны өдөр аймгийн ИТХ-ын Тэргүүлэгчид  Ашигт малтмал тээвэрлэх замын маршрутад өөрчлөлт оруулах тухай тогтоолыг баталсан нь 2020 оны тогтоолтой зөрчилдөж байгаа юм. Энэ талаар 2016-2020 онд Дундговь аймгийн ИТХ-ын даргаар ажиллаж байсан С.Сүхбаатараас тодруулахад, тэрбээр "Аймгийн удирдлагууд нүүрс тээврийн компанийн эрх ашгийн талд үйлчилсэн тогтоол баталсан" гэдгийг хэлж байна.