Г.Ёндон: Манай улс аравдугаар сарын 1-н хүртэл шатахуун тээвэрлэн авчрах боломжгүй болсон

УУХҮЯ-наас шатахууны асуудлаар мэдээлэл хийлээ. ҮҮХҮ-ийн сайд Г.Ёндон "Монгол Улс сарын 38-40 мянган тонн АИ-92 бензин хэрэглэдэг. Уг хэрэглээнийхээ 95 хувийг нь ОХУ-аас, 5-10 хувийг БНХАУ-аас нийлүүлдэг. ОХУ-аас авах шатахууны хэмжээг гэрээгээр зохицуулдаг. Гэрээнд сар бүр хамгийн  багадаа 28 мянган тонн АИ-92 шатахууныг ОХУ-аас авна гэж хоёр тал харилцан үүрэг хүлээсэн байдаг. Гэвч наймдугаар сарын сүүлээс дээрх хэмжээний шатахууныг нийлүүлж чадахгүй гэж ОХУ-аас мэдэгдэн, есдүгээр сард 17 мянган тонныг нийлүүлэх боломжтой гэж мэдэгдсэн. 

Иймд бид хэрэгцээгээ хэвийн хангахын тулд БНХАУ-ын талтай манай улс хэлэлцээ хийж, дотоодын таван аж ахуйн нэгж гэрээ хийсэн. Өнөөдрийн байдлаар сар гаруйн хугацааны хэрэглээний нөөцийг авахаар ААН-үүд мөнгөө төлж, наашаа авах вагоны кодоо авсан. Бид ямар нэг хомсдол үүсгэхгүйгээр шатахуун авах байлаа.

Гэтэл өчигдөр ОХУ-аас есдүгээр сарын 16-нд аравдугаар сарын 1-н хүртэл шатахуун нийлүүлэх боломжгүй болсноо бидэнд мэдэгдсэн. Үүнтэй хэрэгцэн БНХАУ-ын төмөр замын компани нь дотооддоо ачаа тээврийн ачаалал их байгаа тул захиалсан шатахууныг аравдугаар сарын эхээр нийлүүлэхээ мэдэгдсэн. Тиймээс аж ахуйн нэгжүүд өчигдрөөс хязгаарлалт хийсэн" гэлээ.