Америкийн саятнууд үр хүүхдүүддээ их хөрөнгө үлдээхээс эмээдэг

Консалтингийн “The Motley Fool” компаниас АНУ-ын саятнуудын дунд санал асуулга явуулахад 67 хувь нь үр удамдаа их хэмжээний хөрөнгө өвлүүлж үлдээхээс эмээдэг гэсэн хариу өгчээ.

Ингэхдээ асуулгад оролцсон саятнуудын 58,74 хувь нь үр удам нь үлдээсэн их хөрөнгийг хариуцлагагүйгээр зарцуулж үрэн таран хийнэ гэхээс хамгийн их эмээдэг гэсэн хариу өгч. Харин 56,54 хувь нь ар гэрийнх нь хүмүүс их хэмжээний хөрөнгийг захиран зарцуулах бэлтгэлгүй гэсэн хариу өгсөн байна.

Мөн асуулгад оролцсон саятнуудын 56,3 хувь нь цуглуулсан их хөрөнгөө удам дамжуулан өвлүүлэхийн оронд  буяны үйл хэрэг гэх мэт өөр зүйлд зарцуулсан нь дээр гэсэн хариу өгсөн байна. Харин 55,77 хувь нь үр удамдаа их хэмжээний хөрөнгө өвлүүлэн үлдээвэл тэд ажил хийхгүй залхуу хойрго хүмүүс болж хувирна гэж үздэгээ хэлжээ.

Иймд Америкийн саятнуудын 67,74 хувь нь өв залгамжлагчдаасаа олон тооны нөхцөл биелүүлэхийг шаардахаар төлөвлөөд байгаагаа хэлжээ. Үүний тулд хөрөнгө өвлөгч нь тодорхой тооны нөхцөл биелүүлсэн тохиолдолд л захиран зарцуулах эрх олгодог сэдэлжүүлсэн санд хөрөнгөө үлдээх аж.

Дашрамд сонирхуулахад, 2020 оны байдлаар АНУ нь саятнуудынхаа тоогоор дэлхийд тэргүүлсэн хэвээр байна. Швейцарын “Credit Suisse” банкнаас 2020 бэлдэж гаргасан “The Global Wealth Report” тайланд дурдсанчлан АНУ-д 21,9 сая долларын саятан амьдарч байгаа нь дэлхийн нийт саятнуудын 39 хувь болдог. Нэн баян буюу 100 сая доллароос дээш хөрөнгө хүмүүсийн тоогоор ч АНУ дэлхийд тэргүүлдэг бөгөөд ийм хөрөнгөтэй 110 мянга 85 хүн тэнд байна гэж судалгаагаар гарчээ.

Энэ олон сая саятнуудын өв хөрөнгийн асуудал гэдэг зөвхөн цөөн хэдэн гэр бүлийн бус улс орны санхүү, эдийн засагт нөлөөлөх хэмжээний чухал асуудал болж хувирдаг. Ийм ч учраас Америкийн саятнууд өв хөрөнгөө хэрхэн өвлүүлэхэд хэдийнээсээ онцгой анхаарсаар ирсэн байна. Жишээлбэл, дээр дурдагдсан тодорхой нөхцөлтэйгөөр захиран зарцуулах эрх өгдөг сангийн тухайд өв залгамжлагч нь заавал бакалавр ба түүнээс дээш эрдмийн цолтой байх гэсэн шаардлага тавьж болдог аж. Мөн өв залгамжлагчийн бие даан ажиллаж олж байгаа мөнгө нь их байх тусам өвлүүлсэн хөрөнгөнөөс захиран зарцуулах хэмжээ нь нэмэгдэж байх нөхцөлийг ч бас зааж өгдөг юм байна.