Дархан-Уул аймаг дахь төрийн өмчийн их сургуулиудыг "Сургалт-Судалгаа-Үйлдвэрийн цогцолбор" болгон хөгжүүлнэ

Дархан-Уул аймагт нийт 9 их, дээд сургууль коллеж үйл ажиллагаа явуулдаг. Үүнээс 3 нь төрийн өмчийн их сургууль байна. Одоогоор ХААИС-ийн Дархан дахь бүрэлдэхүүн сургуульд 444, ШУТИС-ийн Дархан-Уул аймаг дахь Технологийн сургуульд 1102, АШУҮИС-ийн Дархан-Уул аймаг дахь салбар Анагаах ухааны сургуульд 879 оюутан суралцаж байна. Дээрх их сургуулиуд хүчин чадлаасаа доогуур ашиглалттай сургалт явуулж байна. Орон нутгийн их, дээд сургуулиудыг “Сургалт-Эрдэм шинжилгээ-Үйлдвэрлэлийн цогцолбор” болгон хөгжүүлэх ажлыг үе шаттайгаар хэрэгжүүлэх замаар их дээд сургуулиудын хичээлийн байрны хүчин чадал, нөөц боломжид суурилан одоогийн суралцагчдын тоог 2-3 дахин нэмэгдүүлэх бүрэн боломжтойг Боловсрол, шинжлэх ухааны дэд сайд Г.Ганбаяр өнөөдөр /2021.09.20/ аймгийн удирдлагуудтай уулзах үеэрээ онцлов.

Дээрх үе шаттай арга хэмжээг хэрэгжүүлэх шийдвэрийг Монгол Улсын Засгийн газраас гаргасан бөгөөд эхний ээлжинд оюутны байрны хүртээмж болон багш, ажилчдын нөөцийг бүрдүүлэх, оюутнуудад зориулсан сургалтын төлбөрийн хөнгөлөлт, тэтгэлэгт хөтөлбөрийг их сургууль, орон нутгийн захиргаа, бизнесийн байгууллагатай хамтран боловсруулж, хэрэгжүүлэх, багш, ажилтны нийгмийн баталгааг хангаж, дэмжлэг үзүүлэх, хөнгөлөлттэй зээлд хамруулах, орон нутагт тогтвор суурьшилтай ажилласны тэтгэмж олгох эрх зүйн орчныг бүрдүүлэх арга хэмжээг их сургууль, орон нутгийн захиргаа, бизнесийн байгууллагатай хамтран хэрэгжүүлэх зэрэг асуудлуудыг шийдвэрлэх шаардлагатай байгааг салбар яамнаас танилцууллаа.

Дархан-Уул аймгийн хэмжээнд хэрэгжүүлж буй төсөл хөтөлбөрийн хүрээнд багш ажилчдын орон сууцны асуудлыг шийдвэрлэх, оюутны хотхон, сургалтын бааз суурийг нэмэгдүүлэх барилга байгууламж барих газрыг хот төлөвлөлттэй уялдуулан шийдвэрлэх боломжтойг аймгийн Засаг дарга Б.Азжаргал онцолсон юм. “Сургалт-эрдэм шинжилгээ-үйлдвэрлэлийн цогцолбор” болгон хөгжүүлэх ажлын төлөвлөгөөг орон нутгийн онцлог, бүсчилсэн хөгжлийн үзэл баримтлалд нийцүүлэн, боловсруулж, хэрэгжүүлэх ажлын хүрээнд салбарын дэд сайдаар ахлуулсан ажлын хэсэг энэ сарын 20, 21-ний өдрүүдэд Дархан-Уул аймагт ажиллаж суурь судалгааг нарийвчлан хийнэ.