Хойд Солонгос алсын тусгалтай далавчит пуужин амжилттай туршжээ

Есдүгээр сарын 11 ба 12-ны өдрүүдэд Хойд Солонгосын цэргийнхэн алсын тусгалтай далавчит пуужин амжилттай хөөргөж туршсан тухай тус улсын цахилгаан мэдээний агентлаг мэдээлжээ. Тус мэдээнд “Далавчит пуужингийн хөдөлгүүр, удирдлагын ба чиглүүлэх систем, цэнэгт хошуу зэргийг амжилттай туршлаа. ... Асар чухал ач холбогдолтой стратегийн зэвсэг болох алсын тусгалтай далавчит пуужин зохион бүтээх ажил сүүлийн хоёр жилийн турш амжилттай урагшилж байна” гэж дурдсан байсан тухай Өмнөд Солонгосын “Yonhap” агентлаг уламжилсан байна.

 Хойд Солонгосын мэдээлснээр хөөргөсөн далавчит пуужин нь тус улсын бүх газар нутаг болон мэдлийнх усан дээгүүр нийт 1500 км зайг 7580 секундэд туулсан байна.

 Ингэснээр Хойд Солонгос нь өөрийн гэсэн далавчит пуужинг зохион бүтээж амжилттай туршсан арав хүрэхгүй цөөн улсын нэг болж хувирлаа. Өмнөх жилүүдэд Хойд Солонгос нь байнгын өлсгөлөн, эдийн засаг болон санхүүгийн хямралд нэрвэгдсээр ирсэн хэдий ч цөмийн зэвсэг, хөдөлгөөнт суурь бүхий тив алгасагч пуужин, шумбагч завинаас харвадаг баллистик пуужин гэх мэт аюулт зэвсэглэл бүхий арав хүрэхгүй цөөн улсын нэг болж чадсан юм.  Батлагдаагүй мэдээгээр Хойд Солонгос нь 2019 онд 3000 тонн усан түрц бүхий цөмийн шумбагч онгоц бүтээсэн бөгөөд энэ тухайгаа зарлах таатай мөчийг хүлээн нууцалж байгаа тухай АНУ болон Өмнөд Солонгосын тагнуулын албад мэдээлээд байсан юм. Хэрэв энэ мэдээлэл үнэн бол Хойд Солонгос нь АНУ, ОХУ, Франц, Их Британи, Энэтхэг, БНХАУ гэсэн цөмийн шумбагчтай гүрнүүдийн эгнээнд хэдийн элссэн хэрэг юм.