МОНГОЛ УЛСЫГ ОУВС-ГИЙН ХӨТӨЛБӨРТ ХАМРУУЛАХААР ШИЙДВЭРЛЭЛЭЭ

ОУВС-гийн Захирлуудын Зөвлөлийн хурал өчигдөр шөнө буюу Вашингтоны цагаар тавдугаар сарын 24-ний өдөр болж Монгол Улсыг "Өргөтгөсөн санхүүжилтийн хөтөлбөр"-т хамруулах шийдвэр гаргажээ. Энэ талаар ОУВС-гийн албан ёсны вэб сайтад хэвлэлийн мэдээ дөнгөж сая нийтлэгдлээ. Хэвлэлийн мэдээнд Монгол Улсад гурван жилийн хугацаанд хэрэгжүүлэх санхүүжилтийн хөтөлбөрийн хүрээнд ОУВС-гаас 434.3 сая ам.долларын шууд санхүүжилт өгнө гэжээ. Мөн хандивлагчид болох Азийн Хөгжлийн банк, Дэлхийн банк, Япон, Солонгос, БНХАУ-аас нийт 5.5 тэрбум ам.долларын хөнгөлөлттэй зээлийн шугам нээгдэж байгаа тухай мэдээлсэн байна. Энэ бүх санхүүжилт Монгол Улсын эдийн засгийн хүндрэлийг даван туулахад зарцуулагдана. Засгийн газраас өнгөрсөн жилээс эхлэн ОУВС-гийн хөтөлбөрт хамрагдахаар хөөцөлдөж эхэлсэн билээ. Энэ ажил удаан хугацаанд үргэлжилж өнгөрсөн шөнө биеллээ оллоо.