Өвөлжилт хүндрэх учир малчдыг малаа эдийн засгийн эргэлтэд оруулахыг уриаллаа

Засгийн газрын хуралдааны үеэр  ХХААХҮ-ийн сайд З.Мэндсайхан өвөлжилтийн бэлтгэл ажилталаар мэдээлэл өглөө.

Энэ жил улсын хэмжээнд 1.3 сая тонн өвс, 1.6 мянган тонн сүрэл, 13 мянган тонн ногоон тэжээл, 95.9 мянган тонн үйлдвэрлэлийн тэжээл, 98 мянган тонн гар тэжээл, 132 мянган тонн хужир бэлтгэхээр төлөвлөсөн. Энэ ажил 13 хувийн гүйцэтгэлтэй байна гэв. 

Энэ жил хур бороо ихтэйучир хадлан тэжээлийн бэлтгэл хойшилж байна. Мөн хур бороо элбэг байснаас газрын хөрс чийгтэй байгаа учир өвөлжилт хүндэрнэ. Цочир хүйтэрснээс газрын хөрс хөлдөнө. Намар эрт цас орвол газрын гадаргад мөсөн бүрхүүл тогтож, зудын эрсдэл бий болно. Тиймээс малчид малаа эдийн засгийн эргэлтэд оруулах, даатгалд хамрагдахыг уриалж байна. 

 Нийслэлд 20 орчим мянган тонн мах бэлтгэнэ. Энэ хүрээнд Засгийн газраас 100 тэрбум төгрөгийн эх үүсвэрийг арилжааны банкуудаар дамжуулан олгоно. Энэ нь гурван хувийн хүүтэй, 7.65 хувийн арилжааны банкны хүүгийн зөрүүг Засгийн газар төсөвт тусган шийдэхээр болсон. Нийт дотоодын махны бэлтгэлд 17 ААН урьдчилсан байдлаар гэрээ хийсэн.

Ургацаа бүрэн авахад хүн хүчний асуудал байна. Тиймээс үүнд 1600 орчим цэрэг, 113 оюутан, 1200 орчим иргэн гэрээ байгуулан  оролцож байна. Ургац хураалтад 1000 орчим компани оролцож байна. Засгийн газрын санаачлан батлуулсан газар тариалангийн тоног төхөөрөмжийг НӨАТ, Гаалийн татвараас чөлөөлсөн. Үүний үр дүнд 18 орчим тэрбум төгрөгийн хөнгөлөлтийг 50 орчим компанид үзүүллээ. Тиймээс намрын ургац хураах тоног төхөөрөмжийн бэлэн байдлыг хангалаа. Үр тариа хүлээн авах савны ариун цэврийн болон технологийн ажлыг бүрэн хийж дуусгалаа.

Мөн Засгийн газрын хуралдаанаар махны экспортыг нэмэгдүүлэх чиглэлд Дорнод, Булган, Архангай, Ховд аймагт үйлдвэр байгуулахаар боллоо. Санхүүжилтийг Хятадын Засгийн газрын нэн хөнгөлөлттэй зээлээс гаргахаар болсон байна.