Батлан хамгаалахын дэд сайд Б.Баярмагнайг АТГ-т шалгуулъя

СБД-ийн 19-р хороо Хандгайтын ойн бүсэд голын хажууд ургасан бургасыг сүйтгэж, голын урсгалд сөргөөр нөлөөлсөн, мөн ногоон бүсийг сүйтгэсэн, голыг модтой нь хашаалж 20 гаруй барилгын суурь цутгасан байгааг долдугаар сарын 05-нд бид шууд дамжуулалтаар хүргэсэн байдаг.

 Манай мэдээллийн мөрөөр тухайн газарт Экологийн цагдаагийн алба, Нийслэлийн байгаль орчны газраас очиж ажилласан.

Ойн бүсэд “Ориент инвестмент пропертиз ХХК” гэх компани барилгын ажил явуулж байсныг Экологийн цагдаагийн албанаас зогсоогоод байсан. Гэтэл наймдугаар сараас эхлэн тухайн компани барилгын ажлаа үргэлжлүүлж явуулсж байна гэх мэдээллийн дагуу бид нөхцөл байдлыг сурвалжилахаар очиход машин, техник хэрэгслээр ажлаа үргэлжлүүлж байсан юм.

Эх сурвалжийн мэдээллээр "Хандгайт велла” гэх хотхон барихаар энэ оны гуравдугаар сарын 23-нд үйл ажиллагаа эхлүүлж, барилгын ажил явуулж байсныг тус ойн ангийн байцаагч н.Хүрэлсүх нь ойн бүсийг сүйтгэж байна гэдэг үндэслэлээр зөрчлийн хэрэг үүсгэж таван сая төгрөгийн торгууль ногдуулж байжээ. Харин тус газарт "Ориент Инвестмэнт Пропертиз ХХК" зөвшөөрөл  авсан гэх байдлаар байгаль орчныг сүйтгэж ажлаа үргэлжлүүлсээр байсан талаар Нийслэлийн байгаль орчны газраас мэдээлж байв.

Бид энэ асуудлаар СБД-ийн Газар зохион байгуулалтын албанаас тодруулахад "Хандгайтын ойн бүсэд 2012 оны 04 сард 2,8 га газрыг ой хамгаалах, нөхөн сэргээх зориулалтаар “Ориент инвестмент пропертиз ХХК”-д тухайн үеийн СБД-ийн засаг дарга буюу одоогийн Батлан хамгаалахын дэд сайд Б.Баярмагнайн захирамжаар зөвшөөрөл олгож байжээ.

Газраа “ой хамгаалах” зориулалтаар авчихаад тухайн оныхоо 11 сард “зуслан”-гийн зориулалт болгон өөрчлөх, хугацааг нь сунгах хүсэлт өгчээ.

 Тухайн үеийн Засаг дарга Б.Баярмагнай нь зуслангийн зориулалт болгож өөрчлөх, хугацаа сунгахад ч гарын үсгээ зуржээ.

Энэ талаар СБД-ийн Газрын албанаас ч батлан мэдээлдэг.

Өнөөдрийн /2021.09.03/ байдлаар Экологийн цагдаагийн албанаас "Ориент Инвестмэнт Пропертиз ХХК"-д Эрүүгийн хэрэг нээн шалгаж байна.

Ойг нөхөн сэргээх, хамгаалах зориулалтаар газар олгочихоод дахин "зуслан"-гийн зориулалт болгон өөрчилөхөд ч Б.Баярмагнай гарын үсгээ зуржээ. Иймд "Ориент инвестмэнт пропертиз" гэх компанитай СБД-ийн Засаг даргаар ажиллаж байсан Б.Баярмагнай ашиг сонирхлын үүднээс ЗАХИРАМЖ гаргасан байж болзошгүй байна. Мөн СБД-ийн засаг даргаар ажиллаж байхдаа зуслангийн хичнээн газарт иймэрхүү байдлаар газар эзэмших зөвшөөрөл олгосон нь тодорхой бус байгаа юм.

Тиймээс Авилгатай тэмцэх газраас 2012 оноос СБД-ийн Засаг даргаар ажиллаж байсан, одоогийн Батлан хамгаалахын дэд сайд Б.Баярмагнайг шалгаж өгөхийг шаардаж байна.