Афганистанд америкчуудын үйлдсэн энгийн иргэдийн эсрэг гэмт хэргийг мөрдөж шалгахыг уриалав

АНУ болон түүний холбоотнуудыг Афганистанд 20 жил эзэн суухдаа үйлдсэн энгийн номхон иргэдийг үй олноор нь хөнөөсөн гэмт хэргүүдийг бүгдийг нь мөрдөн шалгахыг БНХАУ уриалсан байна.

 БНХАУ-ын Гадаад яамны төлөөлөгч энэ талаар ярихдаа “Америкийн цэргүүд Афганистанаас гарсан хэдий ч тэд болон холбоотнуудынх нь зүгээс энгийн номхон иргэдийг үйл олноор хөнөөсөн гэмт хэргүүдийг нарийвчлан шалгаж, буруутнуудыг нь хариуцлагад татах ёстой” гэжээ.

 Хятадын Гадаад яамны мэдээгээр 2020 оны дөрөвдүгээр сарын байдлаар гэхэд АНУ цэргүүдийн үйлдлээс болж 47 мянган энгийн номхон афган иргэн амиа алдсан байжээ.

 Хамгийн сүүлд гэхэд л наймдугаар сарын 29-нд Кабул хотод, хүн олноор оршин суудаг хорооллын гудамжаар явсан хоёр машиныг Америкийн байлдааны дроноос пуужин харван довтолсон. Довтолгооны улмаас хоёр машин, нэг байшин юу ч үгүй сүйдсэн. Энэ дайралтыг америкчууд тайлбарлахдаа “Лалын улс” бүлэглэлийн алан хядагчид сууж явсан тэсрэх бодис бүхий машин руу өрсөж цохилт өгөхөөс өөр аргагүй болсон гэсэн. Дайралт болон түүний дараа үүссэн хүчтэй дэлбэрэлтийн улмаас долоон хүүхэд амиа алдсан гэж Кабул хот дах НҮБ-ын Хүүхдийн сангийн төлөөлөгч Герве де Лис мэдэгдээд байгаа юм. Харин Америкийн тал тайлбар өгөхдөө манайд дайралтын улмаас ямар нэг энгийн иргэн, тэр дундаа хүүхэд хохирсон гэх мэдээлэл ирээгүй гээд таг болсон.

Гэхдээ зарим шинжээчид Хятадын Гадаад яам ийм байдлаар АНУ ба түүний холбоотнууд Шинжаан дах уйгаруудыг хоморголон устгасан гэх асуудлыг тогтмол хөндөж байгаагийн хариуг барьж байна гэж үзжээ.