Оросоос зэвсэг худалдаж авбал хориг арга хэмжээ авна гэж анхааруулжээ

АНУ-ын Төрийн департамент холбоотон болон түнш улсууддаа хандан ОХУ-тай батлан хамгаалах салбарт хамтран ажиллахгүй байхыг анхааруулаад анхааруулгыг үл тоосон улс орнуудын эсрэг хориг арга хэмжээ авах хуультай гэдгийг сануулсан байна.

 Саудын Арави нь ОХУ-тай цэрэг, батлан хамгаалах салбарт хамтран ажиллах тухай гэрээ байгуулсны дараа АНУ-ын Төрийн департамент ийм мэдэгдэл хийж. Төрийн департаментын төлөөлөгч “Бид бүх хамтрагчид болон холбоотон улсуудад хандан Оросын батлан хамгаалах салбартай шинээр том гэрээ хийхээс зайлсхийж байхыг уриалсан хэвээр байгаа бөгөөд үүнийгээ “Америкийн дайснуудыг хориг арга хэмжээ авах замаар эсэргүүцэх” (CAATSA) гэсэн хуулиараа ойлгомжтой мэдэгдсэн” гэжээ.

 Батлан хамгаалах салбарын шинжээчид Орос ба Саудын Арави хооронд арми, зэвсгийн салбарт хамтран ажиллахаар болж байгаа нь АНУ-д нэлээд хүнд цохилт болно гэж дүгнээд байгаа юм.

 Саудын Аравийг Йемений хусит босогчдын эсрэг байлдааны ажиллагаа явуулахдаа хуситуудыг дэмжигч энгийн иргэдийн эсрэг Америкт үйлдвэрлэсэн байлдааны техник, зэвсэг хэрэглэж байна хүмүүнлэгийн байгууллагууд шүүмжилсний дараагаар АНУ нь онгоцны бөмбөг нийлүүлэхээ түр зогсоогоод байгаа юм. Тухайлбал, Трампын үед байгуулсан гэрээ ёсоор 290 сая доллароор “GBU-39 Small Diameter Bomb I” онгоцны бөмбөг 3 мянгыг, 478 сая доллароор өндөр нарийвчлал бүхий залуур бөмбөг 7 мянган ширхгийг нийлүүлэх ёстой байсан ч Йемений партизанууд ба энгийн иргэдийн эсрэг ашиглахгүй гэсэн баталгаа хэрэгтэй гэсэн үндэслэлээр нийлүүлэхээ түр зогсоогоод байгаа юм.

 Гэсэн хэдий Төрийн департамент Ойрх Дорнод дах гол холбоотон улс Саудын Аравийг Оростой гэрээ байгуулсан хэдий ч “... батлан хамгаалах салбарт манай хоёр улсыг их дотно бөгөөд бат бөх түншлэл холбож байдаг” гэжээ.

 НАТО-ийн гишүүн, тус эвсэлдээ АНУ-ын дараа орох хүчирхэг арми бүхий Турк улс нь агаарын довтолгооноос хамгаалах “Пэтриот” систем Америкаас авах гээд татгалзсан хариу сонссоны дараа ОХУ-аас 2 тэрбум доллароор С-400 систем худалдан авсан нь АНУ болон НАТО-ийн гишүүн орнуудыг ихэд гайхшируулж, цочроосон алхам болсон юм. Үүний дараа АНУ нь зэвсэглэлийн зах зээл дээр ОХУ-ын зэвсэг, техникийг шахах эрс шийдэмгий арга хэмжээ авч эхэлсний нэг нь дээр нэр гарсан үүнийгээ “Америкийн дайснуудыг хориг арга хэмжээ авах замаар эсэргүүцэх” (CAATSA) гээч хууль юм. Энэ хуулийг баталснаар АНУ нь зөвхөн холбоотон, НАТО-ийн гишүүн улс гэлтгүйгээр Оросоос зэвсэг авсан ямар ч улсын эсрэг эдийн засгийн болон бусад хориг арга хэмжээг авах эрхийг өөртөө өгсөн.

 Ингэснээр БНХАУ-ыг ОХУ-аас С-400 худалдан авлаа гэж Батлан хамгаалахын сайд болон бусад өндөр албан тушаалтнуудын эсрэг нэр заасан хориг арга хэмжээ авсан. Энэтхэг улсыг 5 тэрбум доллароор С-400 систем Оросоос худалдан авах гэж байгаа шүүмжилж, хориг арга хэмжээ авна гэж анхааруулсаар байгаа юм. Туркийг С-400 авлаа гэж F-35 сөнөөгч онгоцны хөтөлбөрөөс хассан. Цаашид НАТО-ийн хүрээнд зэвсэг техник нийлүүлэх чиглэлээр хамтран ажиллахын тулд Туркийг Оросоос авсан С-400-аа устгах ёстой гэсэн шаардлага тавиад байгаа юм.