ЭЦА: Хандгайтын аманд ойн сав газар хашаалсан “Ориент инвестмэнт пропертиз” ХХК-д эрүүгийн хэрэг үүсгэн шалгаж байна

СБД-ийн 19-р хороо Хандгайтын ойн бүсэд газрыг сүйтгэж, 20 гаруй барилгын суурь цутгасан байгааг бид мэдээлсэн. Манай мэдээллийн мөрөөр тухайн газарт Экологийн цагдаагийн алба, Нийслэлийн байгаль орчны газраас очиж ажилласан.

Эх сурвалжийн мэдээллээр "Хандгайт велла” гэх хотхон барихаар энэ оны гуравдугаар сарын 23-нд үйл ажиллагаа эхлүүлж, барилгын ажил явуулж байсныг тус ойн ангийн байцаагч н.Хүрэлсүх нь ойн бүсийг сүйтгэж байна гэдэг үндэслэлээр зөрчлийн хэрэг үүсгэж таван сая төгрөгийн торгууль ногдуулж байжээ. Харин тус газарт зөвшөөрөл авсан гэх байдлаар байгаль орчныг сүйтгэж ажлаа үргэлжлүүлсээр байсан талаар Нийслэлийн байгаль орчны газраас мэдээлж байна.

Бид энэ асуудлаар СБД-ийн Газар зохион байгуулалтын албанаас тодруулахад "Хандгайтын ойн бүсэд 2012 оны 04 сард 2,8 га газрыг ой хамгаалах, нөхөн сэргээх зориулалтаар “Ориент инвестмент пропертиз ХХК”-д тухайн үеийн СБД-ийн засаг дарга буюу одоогийн Батлан хамгаалахын дэд сайд Б.Баярмагнайн захирамжаар зөвшөөрөл олгож байжээ. Газраа “ой хамгаалах” зориулалтаар авчихаад тухайн оныхоо 11 сард “зуслан”-гийн зориулалт болгон өөрчлөх, хугацааг  нь сунгах хүсэлт явуулахад мөн л Б.Баярмагнай гарын үсгээ зуржээ. Энэ онд СБД-ийн газар зохион байгуулалтын албанд 2,8 га газраа 34 хүний нэр дээр шилжүүлэх хүсэлт оруулаад түдгэлзсэн хариу өгсөн талаар Газар зохион байгуулалтын албанаас мэдээлж байна. Тус 34 хүний нэрс дунд Гомбосүрэнгийн Гансүх, Дашзэвэгийн Оюунжаргалт гэх мэтчилэн иргэдийн нэрс байгаа юм.

Экологийн цагдаагийн албанаас “Ориент инвестмент пропертиз ХХК”-д Эрүүгийн хэрэг нээн ажиллаж байгаа талаар мэдээллээ.
 

 Бид энэхүү газарт олгогдсон компанийн зөвшөөрлийг цуцалж, нөхөн сэргээлт хэрхэн хийхийг үргэлжлүүлэн сурвалжилсаар байх болно.