Олимпын хүрэл медальтан бүх мөнгөн шагналаа өвдсөн, гачигдсан хүмүүст тараажээ

 Токиогийн Олимпын чөлөөт бөхийн хүрэл медальт Казахстаны Нурислам Санаев медалийг нь дагаж ирсэн бүх мөнгөн урамшууллыг ядуу айл өрх, хүнд өвдсөн хүүхдүүдэд хандивлахаар болсон байна. Казахстан нь энэ жил хүрэл медаль авсан тамирчдаа 31 сая тенге буюу 70 мянган доллароор урамшуулсан юм. Нурислам Санаев “Инстаграмм” хуудсандаа “Хүндэт нөхөд өө! Надад итгэж, намайг дэмжиж, надад олгосон Казахын ард түмэнд баярлаж талархсанаа илэрхийлье, миний сэтгэл маш их хөдөлж байна.Спорт бол сая сая хүний сэтгэл хөдлөл, урам, дэлхий ертөнцөөс бидэнд өгч байгаа хүч тамир байдаг гэдгийг та бүхэн мэднэ.

Би хүүхэд байхаас л Олимпоос алтан медаль авч, гачигдсан, зовсон хүмүүст болон өвдсөн хүүхдүүдэд туслах юм сан гэж мөрөөддөг байлаа. Иймд би энэ удаад мөрөөдлөө биелүүлж, шагналын бүх мөнгөө Казахстаны ядуу айл өрхүүд, өвдсөн хүүхдүүдэд буян болгон өгөхөөр шийдлээ. Тэд бүгд аз жаргалтай байг!” гэжээ.  

Насан туршдаа мөрөөдөж, залуу нас хамаг ухаан бодол хүч тамираа зарцуулан шударга хөдөлмөрөөр олсон энэ их мөнгийг ингээд огт таньж мэдэхгүй хүмүүст тусламж болгон өгч чадах зүрх сэтгэлтэй хүн хэр олон байдаг бол?