Хандгайтын ой, голыг хашаалсан компани барилгын ажлаа үргэлжлүүлж, Экологийн цагдаагийн алба мэдээлэл өгөхгүй гүрийсээр байна

СБД-ийн 19-р хороо Хандгайтын ойн бүсэд байгаль орчныг сүйтгэж, 20 гаруй барилгын суурь цутгасан байгааг бид энэ оны долдугаар сард мэдээлсэн. 

Манай мэдээллийн мөрөөр тухайн газарт Экологийн цагдаагийн алба, Нийслэлийн байгаль орчны газраас очиж ажилласан.Ингэхдээ Экологийн цагдаагийн албанаас тус барилгын ажлыг зогсоож, байгальд учруулсан хохирлын хэмжээг тогтоох талаар мэдэгдсэн байдаг.

Гэвч өнөөдрийн /2021.08.26/байдлаар “ойг голтой хашаалж, барилгын ажил явуулах боломжгүй” гэж зогсоосон газарт барилгын ажил үргэлжилж байгааг тухайн газарт амьдардаг оршин суугчид хэлж байгаа юм.

Мэдээллийг эргэн сануулахад "Хандгайтын ойн бүсэд 2012 оны 04 сард 2,8 га газрыг ой хамгаалах, нөхөн сэргээх зориулалтаар “Ориент инвестмент пропертиз ХХК”-д тухайн үеийн СБД-ийн засаг дарга буюу одоогийн Батлан хамгаалахын дэд сайд Б.Баярмагнайн захирамжаар зөвшөөрөл олгосон байдаг. Газраа “ой хамгаалах” зориулалтаар авчихаад тухайн оныхоо 11 сард “зуслан”-гийн зориулалт болгон өөрчлөх болон хугацааг  нь сунгах хүсэлт явуулахад мөн л Б.Баярмагнай гарын үсгээ зурсан талаар СБД-ийн газар зохион байгуулалтын албанаас мэдэгдсэн байдаг. Тухайн газрыг эзэмшигчид энэ онд СБД-ийн газар зохион байгуулалтын албанд 2,8 га газраа 34 хүний нэр дээр шилжүүлэх хүсэлт оруулаад түдгэлзсэн хариу өгсөн талаар Газар зохион байгуулалтын албанаас мэдээлсэн байдаг. Тус 34 хүний нэрс дунд Гомбосүрэнгийн Гансүх, Дашзэвэгийн Оюунжаргалт гэх мэтчилэн иргэдийн нэрс байгаа юм. 

 Ойн дунд "Хандгайт вилла" гэх хотхон баригдаж байгаа гэх мэдээлэл байдаг бөгөөд тус 2,8 га газрын зөвшөөрөл СБД-ийн засаг даргын захирамжаар цуцлагдах юм. Гэвч өнөөдрийн байдлаар тус газрын зөвшөөрөл цуцлагдаагүй. Барилгын ажил үргэлжлэн явагдаж, гол дагуух бургасыг тасдан ойг, голтой хашаалсан барилгын ажил үргэлжилсээр байна. 

Бид энэ асуудлаар Экологийн цагдаагийн албанаас тодруулахад бидэнд ямар нэгэн мэдээлэл өгдөггүй бөгөөд байгальд хичнээн төгрөгийн хор, хохирол учруулсан нь тодорхойгүй байгаа юм.

Бид энэхүү асуудлаар та бүхэндээ үргэлжлүүлэн сурвалжилга, мэдээллүүдийг хүргэх болно.