Замын-Үүд боомтоор адууны их хэмжээний өлөн гэдэс нөөц дугуйндаа нуун гаргахыг завджээ

Өчигдөр /2021.08.23/ Замын-Үүдийн боомт дахь Хилийн мэргэжлийн хяналтын албанаас Экспортын хяналтын талбайд хууль хяналтын байгууллагуудтай хамтран шалгалт хийжээ. Шалгалтаар 56-99 УБТ,
85-11 УБИ улсын дугаартай тээврийн хэрэгсэлүүд запас буюу нөөц дугуйндаа 574 кг адууны өлөн гэдэс нууж, БНХАУ-ын Эрээн боомтоор гаргах гэж байсныг илрүүлсэн байна. Мөн 1,2 тонн зэс гаргах гэж байсан аж.

Тиймээс зөрчил гаргасан этгээдүүдэд Зөрчлийн тухай хуулийн 11.21.11-д"Тарифын болон тарифын бус хязгаарлалт тогтоосон барааг энэ зүйлийн 1 дэх хэсэгт заасан аргаар гаалийн хилээр хууль бусаар нэвтрүүлсэн, эсхүл нэвтрүүлэхийг завдсан бол тухайн зөрчилд холбогдох барааг хурааж, эсхүл үнийг гаргуулж хүнийг нэг зуун нэгжтэй тэнцэх хэмжээний төгрөгөөр, хуулийн этгээдийг нэг мянган нэгжтэй тэнцэх хэмжээний төгрөгөөр торгоно" гэж заасны дагуу хариуцлага тооцох аж.
Адууны өлөн гэдэс нь тарифын бус хязгаарлалттай бараанд ордог юм.