Испанийн Пау Газол, Аргентины Луис Скола нар зодог тайллаа

Токио-2020 олимпын наадам үргэлжилж байгаатай зэрэгцээд шилдэг тамирчид спортын замналаа өндөрлүүлж байна. Өчигдөр олимпын сагсан бөмбөгийн 1/4 тоглолт явагдаж АНУ, Франц, Словени, Австралийн шигшээ багууд хагас шигшээд шалгарсан. Тэгвэл тус тоглолтуудын дараа Аргентины шигшээ багийн тоглогч Луис Скола, мөн Испанийн шигшээ багийн ах дүү Газолууд шигшээ багийн замналаа өндөрлөж буйгаа зарлалаа.

Аргентины шигшээ багийн шилдэг тоглогч, өдгөө 41 настай Луис Скола 1999 оноос хойш шигшээ багийнхаа төлөө тоглохдоо Афин-2004 алт, Бээжин-2008 хүрэл, ДАШТ-ээс 2002, 2019 онуудад мөнгө, Пан-Америкийн наадмаас алт, Дэлхийн цомоос хошой алт, 4 мөнгө, 3 хүрэл медаль хүртэж байсан. Мөн шигшээ багийнхаа хамтаар 2004, 2008, 2012, 2016, 2021 оны олимпын наадамд оролцож байсан шилдэг тоглогч юм.

 
Тэгвэл Испанийн шигшээ багийн шилдэг тоглогч 41 настай Пау Газол шигшээ багийн замналаа өндөрлөлөө. Ах Газол мөн 2004, 2008, 2012, 2016, 2021 оны олимпын наадамд шигшээ багтайгаа оролцохдоо 2008, 2012 оны олимпын наадамд мөнгө, 2016 оны олимпод хүрэл медаль хүртсэн бол ДАШТ-ээс 2006 онд алтан медаль хүртэж, Европын АШТ-ээс 3 алт, 2 мөнгө, 2 хүрэл медалийг энгэртээ зүүсэн байдаг. Түүнтэй хамт дүү Марк Газол шигшээ багийн замналаа өндөрлүүлж байна.