"Жендэрт суурилсан хүчирхийлэлтэй тэмцэх нь" төсөл Дархан-Уул аймагт амжилттай хэрэгжиж байна

Хөдөлмөр, нийгмийн хамгааллын дэд сайд С.Зулпхар, Швейцарийн хөгжлийн агентлагийн захирал Стефани Бурри, НҮБ-ын Хүн амын сангийн тэргүүн Каори Ишикава нар 2021 оны 08 дугаар сарын 02-ны өдөр Дархан-Уул аймагт ажиллав.

Тэд Хотын захирагчийн орлогч Б.Батболд болон албаны бусад хүмүүстэй уулзан хөдөлмөр эрхлэлт, нийгмийн хамгааллын чиглэлээр манай аймагт хэрэгжиж буй төсөл хөтөлбөрийн үр дүн, цаашид хэрэгжүүлэх үйл ажиллагааны талаар ярилцаж, санал солилцсон юм. Мөн “Нэг цэгийн үйлчилгээний төв”-ийн үйл ажиллагаатай танилцлаа.
Монгол Улсын Засгийн газар, НҮБ-ын Хүн амын сан хамтран Швейцарын хөгжлийн агентлагийн санхүүжилтээр "Жендэрт суурилсан хүчирхийлэлтэй тэмцэх нь" төслийн 2 дугаар шатыг 2020 оны наймдугаар сараас эхлэн хэрэгжүүлж байна.
Дархан-Уул аймагт 2018 онд гэр бүлийн хүчирхийллийн хохирогчдод шаардлагатай тусламж үйлчилгээг үзүүлэх "Нэг цэгийн үйлчилгээний төв"-ийг аймгийн ИТХ-ын тогтоолоор 2018 онд анх байгуулсан бөгөөд манай аймаг тус төвийн үйл ажиллагааг тогтвортой сайн авч явж байгаа, зорилтот үйлчлүүлэгчдэд хүрч үйлчилж байгаа зэрэг үзүүлэлтээр төслийн 2 дугаар шатанд шалгарч түшиц 6 газрын нэгээр сонгогджээ.
"Нэг цэгийн үйлчилгээний төв"-ийн байрыг 250 сая төгрөгөөр аймаг орон нутгаас хөрөнгийг нь шийдвэрлэн худалдан авч ашиглалтад оруулсан бөгөөд тавилга, эд хогшил, тохижилтод донор байгууллагаас 85 сая төгрөгийн дэмжлэг үзүүлэн санхүүжилт олгосноор стандарт шаардлага хангасан тоног төхөөрөмж бүхий үзлэгийн өрөө, гал тогоо, уулзалт, сургалтын өрөө, зөвлөгөө өгөх өрөө зэрэг нийт 14 өрөө тасалгааг иж бүрэн тохижуулж, үйлчлүүлэгчийн аюулгүй байдалд хяналт тавих иж бүрэн камержуулалт, дэмжих бүлгийн үйл ажиллагаанд зориулсан хүлэмж, оёдлын машин, туслах материалууд, барилгын дээврийн засварыг шийдвэрлэн, хохирогчдод нэг цэгээс хамгааллын үйлчилгээг тогтвортой үзүүлэх боломжийг бүрдүүлсэн байна.

 
Хөдөлмөр, нийгмийн хамгааллын дэд сайд С.Зулпхар, Швейцарийн хөгжлийн агентлагийн захирал Стефани Бурри, НҮБ-ын Хүн амын сангийн тэргүүн Каори Ишикава нар "Нэг цэгийн үйлчилгээний төв"-ийн өнөөгийн нөхцөл байдал, үйл ажиллагааг газар дээр нь очиж үзэх үеэр НҮБ-ын Хүн мын сангаас хүчирхийллийн хохирогч охид, эмэгтэйчүүдэд зориулан ариун цэвэр, эрүүл ахуйн 30 ширхэг багцыг өгсөн юм.