УЕПГ: "Аба плюс" компани мөнгө угаах гэмт хэрэг үйлдсэн эсэхийг тогтоох ажиллагаа хийгдэж байна

 Гадаадын 100 хувийн хөрөнгө оруулалттай “Аба плюс” компани бүтэн нэг жил, найман сарын хугацаанд дансаа битүүмжлүүлээд байна.  Тодруулбал европын 10 гаруй улс орны хөрөнгө оруулагчид нь тус компанийн дансанд 17 орчим тэрбум төгрөгийг байршуулсан байдаг.  Гэтэл манай Эрүүгийн цагдаагийн албаны Эдийн засгийн гэмт хэрэгтэй тэмцэх газрын Мөрдөн шалгах хэлтсээс 2020 оны нэгдүгээр сарын 13-ны өдөр дансыг нь битүүмжилжээ. 

Уг асуудалд УЕПГ-ын ОНХА-ны дарга, ахлах прокурор Д.Дашмаа дараах тайлбарыг өглөө. Тэрбээр “Аба плюс” компанитай холбогдох хэрэг нь УЕПГ-ын Хэрэг бүртгэх, мөрдөн байцаах ажиллагаанд хяналт тавих хэлтэст тус компанийн өмгөөлөгчөөс гаргасан гомдлын дагуу хянагдаж байна. Хэрэгт уг компанийн дансанд гадаад улсаас шилжиж орж ирсэн, гарсан их хэмжээний мөнгөн гүйлгээний эх үүсвэрийг шалгаж, мөнгө угаах гэмт хэрэг үйлдэгдсэн эсэхийг тогтоох ажиллагаа хийгдэж байна. Тодруулбал, банк дахь дансыг нь  битүүмжилж, арав орчим гадаад улсад эрх зүйн туслалцааны хүсэлт илгээсэн. Одоогоор хүсэлтийн хариунууд бүрэн ирээгүй байна. Гадаад улсад эрх зүйн туслалцааны хүсэлт илгээх, хариу ирүүлэх ажиллагаа нь нарийн процесс ажиллагаа байдаг тул цаг хугацаа их шаардагддаг юм" гэв.