ВИДЕО: АИ-92 авто бензиний үнэ 2050 төгрөг болж нэмэгдлээ

Өнөө өглөөнөөс эхлэн АИ-92 төрлийн авто бензиний үнэ литр тутамдаа 2050-2060 төгрөг болж өсжээ. 

Ашигт малтмал, газрын тосны газрын дарга Ц.Эрдэнэбаяр өчигдөр мэдээлэл хийх үеэрээ  "Гадаад зах зээлд үнийн өсөлт үүсч байгаа учраас шатахууны үнэ нэмэгдэх магадлалтай байна. Шатахууны нөөц, чанарын асуудлыг авч үзэх хэрэгтэй. Төрийн зүгээс шатахууны үнийг шууд хянах боломжгүй. Хуулийн заалтын дагуу гадаад зах зээл дээрх үнийн өсөлтийн хэлбэлзлийг харгалзаж хяналт тавьдаг. Үнэтэй холбоотойгоор чанар, нөөцийн асуудлыг ярьдаг. Газрын тосны дэлхийн зах зээл дээрх үнэ өссөөр байгаа. Тиймээс зах зээлийн зарчмыг дагаад өссөн үед нь өсөөд буурсан үед нь буурахаар зохицуулалтыг хийж ажиллаж байгаа" гэсэн тайлбарыг өгсөн юм.

 Шатахуун импортлогч аж ахуй нэгжүүд энэ сарын эхээр шатахууны үнээ литр тутам 300 төгрөгөөр нэмсэн. Гэсэн ч энэ нэмэгдэл нь хангалтгүй байгаа бөгөөд яг одоогоор импортлогч компаниуд АИ-92 бензинийг л гэхэд 2000 төгрөгөөр авч, 1750 төгрөгөөр зарж байгаа нь зөвхөн нэг сарын хугацаанд л гэхэд 30 тэрбум төгрөгийн алдагдал хүлээж байгаа гэж мэдэгдсэн. Тэгвэл  энэ дагуу шатахуун импортлогч аж ахуй нэгжүүд  АИ-92 авто бензиний үнэ 2050-2060 төгрөг болгож нэмэгдүүллээ.