Саейд Моллайд гурван сая төгрөг, М.Уранцэцэг, Ц.Цогтбаатар нарт хоёр сая төгрөг сар бүр олгоно

Токио-2020 олимпоос Саейд Моллай мөнгөн медаль хүртсэн. Харин  М.Уранцэцэг, Ц.Цогтбаатар нар олимпийн наадмаас хүрэл медаль хүртээд байна.

2012 оны наймдугаар сард гарсан Ерөнхийлөгчийн зарлигийн дагуу тэдэнд сар бүр урамшуулал олгоно. Тодруулбал олимпийн наадмаас мөнгөн медаль хүртсэн Саейд Моллайд сар бүр гурван сая төгрөгийн урамшуулал олгоно. Харин Олимпийн наадмаас мөнгөн медаль хүртсэн М.Уранцэцэг, Ц.Цогтбаатар нарт хоёр сая төгрөгийн урамшууллыг сар бүр олгох юм.

Уг зарлигаар олимп, дэлхийн аварга шалгаруулах тэмцээнээс медальт байр эзэлсэн Монгол Улсын иргэнд сар бүр урамшуулал олгохоор тусгасан. Үүнд:

• Олимпын наадмаас алтан медаль хүртсэн тамирчинд 4 сая төгрөгийн;
• Олимпын наадмаас мөнгөн медаль хүртсэн тамирчинд 3 сая төгрөгийн;
• Олимпын наадмаас хүрэл медаль хүртсэн тамирчинд 2 сая төгрөгийн;
• Дэлхийн аварга шалгаруулах тэмцээнээс олимпын спортын зай, жинд алтан медаль хүртсэн тамирчинд 2 сая төгрөгийн;
• Дэлхийн аварга шалгаруулах тэмцээнээс олимпын спортын зай, жинд мөнгөн медаль хүртсэн тамирчинд 1 сая төгрөгийн;
• Дэлхийн аварга шалгаруулах тэмцээнээс олимпын спортын зай, жинд хүрэл медаль хүртсэн тамирчинд 500 мянган төгрөгийн.

Зарлигийн дагуу тухайн тамирчны гаргасан амжилтын урамшууллыг ирэх оны 01 дүгээр сарын 01-нээс эхлэн олгох юм.