Самарт яваад сураггүй болсон дөрвөн иргэний хайлтад 7сая 818 мянган төгрөг цугларчээ

Сэлэнгэ аймгийн Ерөө сумын Бугант тосгон Эрээн гол гэдэг газарт самарт явсан 33-58 насны гурван эмэгтэй, нэг эрэгтэй алга болоод 18 хонож байна. Тухайн газарт машин, морь явах боломжгүй, нисдэг тэрэг нисгэх боломжтой юм байна.
Ар гэрийнхэн нь ОБЕГ, ЦЕГ-т хандахад нисдэг тэрэг нь нэг цагийн гурван сая төгрөгийн өртөгтэй гэх шалтгаанаар хайлт хийхгүй, дараа ир гэдэг тайлбарыг хэлдэг байна. Ар гэрийнхэн нь мөнгө нийлүүлж хувийн нисдэг тэргээр таван удаагийн нислэг хийлгээд ч олдоогүй байна.Харин ОБЕГ-аас “гурван хүний багтаамжтай жижиг нисдэг тэрэг нэг цаг нисгэхэд 4,5 сая төгрөг, том буюу найман хүний багтаамжтай нисдэг тэрэг нь хамгийн багадаа 16 сая төгрөг гэх тайлбарыг хэлдэг талаар ар гэрийнхэн нь хэлж байна. Жижиг нисдэг тэрэг дөрвөн цаг хөлслөхөд ойролцоогоор 20 гаруй сая төгрөг шаардлагатай учир сайхан сэтгэлт иргэдээсээ ар гэрийнхэн нь тусламж хүсээд байгаа юм. Тэгвэл зариг.мн сайтаар өчигдөр /2021.07.20/ оройн 21:20 минутад цацагдсан шууд дамжуулалтаас өглөөний /2021.07.21/ 10 цаг хүртэл 7 сая 818 мянган төгрөг цугларчээ. Нисдэг тэрэг дөрвөн цаг түрээслэх шаардлагатай гэж тооцоолсон бөгөөд үүнээс хоёр цагт нь Сэлэнгэ аймгийн Бугант руу Улаанбаатараас ирж, очих ба үлдсэн хоёр цаг хайлт хийнэ гэж тооцоолж байгаа юм.