​ Марк Кавендиш түүхэн амжилт үзүүлэв

Мэргэжлийн дугуйн спортын хамгийн нэр хүндтэй гурван Гранд тур (Жиро д’Италиа, Тур де Франс, Вуэльта Испаниа)уралдаануудын нэг болох Тур де Франс уралдаан үргэлжилж байна. Өчигдөр тэмцээний 13 дахь гараа Францын өмнөд нутгийн Нимээс Каркасон хүртэл 220 км-н зайд явагдаж Куик Стэп багийн М.Кавендиш 5 цаг 04 мин 29 сек-н амжилтаар тэргүүн байр эзэллээ. Ингэснээр Британи дугуйчин М.Кавендиш Тур де Франс уралдаанд нийтдээ 34 гараанд түрүүлж бүх-цаг үеийн рекорд амжилтыг эзэмшигч Бельгийн Эдди Мерксийн амжилттай зэрэгцлээ. 

36 настай Марк Кавендиш 2004 оноос мэргэжлийн замналаа эхлүүлсэн бөгөөд энэ хугацаанд Тур де Франс уралдаанд 34, Жиро д’Италиа уралдаанд 15, Вуэльта Испаниа уралдаанд 3 гарааны ялагч болоод байна. Түүнээс өмнө Тур де Франс уралдаанд Бельгийн домогт дугуйчин Эдди Меркс 34 гарааны ялагч болж байжээ.