Тампа Бэй Лайтнинг стэнлийн цомыг хүртлээ

Манай гарагийн шайбтай хоккейн хамгийн нэр хүндтэй тэмцээн болох Хойд Америкийн ҮХЛ (NHL)-н 2020-2021 оны плэй-оффын тоглолт өндөрлөж, стэнлийн цомын эзнээр Тампа Бэй Лайтнинг баг тодорлоо. Ингэснээр Тампа Бэй Лайтнинг баг сүүлийн хоёр улирал дараалан стэнлийн цомыг хүртэж байна.

NHL-н стэнлийн цомын шигшээ шатанд Тампа Бэй Лайтнинг болон Монреаль Канадиенс багууд шалгарч үлдээд байсан. Хоёр багийн тоглолт цувралын тав дахь тоглолтонд шийдэгдсэн бөгөөд Тампа Бэй Лайтнинг цувралд 4-1 харьцаатай ялалт байгуулав. Цувралын 5 дахь тоглолт өнөө өглөө (УБ-ын цагаар) Тампа Бэй Лайтнинг багийн Амалие Арена ордонд болсон. Тоглолт 1-0 харьцаатай өндөрлөсөн бөгөөд Тампа Бэй Лайтнинг багаас тоглолтын хувь заяаг шийдсэн ганц гоолыг Р.Кольтон оруулсан. Ийнхүү Тампа Бэй Лайтнинг баг 1-0 харьцаатай өрсөлдөгч Монреаль Канадиенс багийг хожиж 2020-2021 оны стэнлийн цомын эзэн болжээ.