Дорнод аймагт баяр наадам зохион байгуулахгүй байхаар шийджээ

Дорнод аймгийн онцгой комиссын 2021 оны зургаадугаар сарын 30-ны өдрийн хуралдааны шийдвэрээр аймаг, сумдад баяр наадам зохион байгуулахгүй байхаар шийдвэрлэжээ. Хуралдааны шийдвэрийн талаар аймгийн Онцгой байдлын газрын дарга, аймгийн Онцгой комиссын орлогч дарга, хурандаа Г.Нармандах мэдээлэл өглөө.

1. Дорнод аймаг болон сумдад баяр наадам зохион байгуулахгүй. Наадам тэмдэглэн өнгөрүүлэхэд төсөвлөсөн зардлыг Ковид-19 халдвартай тэмцэх ажилд зарцуулна.

2. Улсын баяр наадмын үндэсний бөхийн барилдаан, үндэсний сур болон шагайн харваанд аймгаа төлөөлж оролцох бөх, сур, шагайн холбоодын саналыг үндэслэн төрөл тус бүрд 20-иос илүүгүй тамирчныг аймгийн Шуурхай штабын хяналтад зорчуулах боломжтой. Зөвхөн оролцох тамирчид зорчих бөгөөд баталгааны хуудас бөглүүлж, буцаж ирэхэд нь шинжилгээ авч нэвтрүүлэн, тусгаарлах байранд өөрийнх нь зардлаар 7 хоног тусгаарлана. 

 3. 2021 оны долоодугаар сарын 10-ны өдрийг дуусталх хугацаанд Дорнод аймгийн нутаг дэвсгэрээс нийслэл болон өөр аймаг руу адуу тээвэрлэхийг хориглолоо. 

 4. Хот хооронд, сум хооронд зорчих хөдөлгөөний хязгаарлалтыг 2021 оны долоодугаар сарын 1-10-ны өдрийг дуустал үргэлжлүүлэн дахин 10 хоногоор сунгав.  /Хүндэтгэн үзэх шалтгаантай иргэд болон зөвшөөрөгдсөн ажил үйлчилгээ эрхэлж буй иргэн, зөвшөөрөгдсөн ачаа тээвэрлэлт нь урьдын адил аймгийн Шуурхай штабын www.70584647.mn site-д хүсэлтээ өгч, холбогдох сумын болон аймгийн Шуурхай штабаас зөвшөөрсний дараа зорчино/ 

5. Эрүүл мэндийн сайд болон Сангийн сайдын хамтарсан тушаалын дагуу 2021 оны долоодугаар  сарын 01-ний өдрөөс коронавируст халдварт өртсөн шинж тэмдэггүй болон хөнгөн өвдсөн иргэдийг сумын Онцгой комиссын хяналтад Сум, Өрхийн Эрүүл мэндийн төвд эмчлэх ажлыг зохион байгуулна. 

6. Зөвхөн гэр бүлийн гишүүдтэйгээ агаар салхинд гарах аяллыг зөвшөөрөх ба хамт олон найз нөхдийн аялал зугаалга зохион байгуулж бүлэг, бөөгнөрөл үүсгэсэн тохиолдолд хариуцлага тооцож ажиллана.

Эх сурвалж: Дорнод аймгийн ЗДТГ