Уимблидон жилийн дараа эргэн ирлээ

Мэргэжлийн талбайн теннисний хамгийн нэр хүндтэй дөрвөн Их дуулга тэмцээний нэг болох зүлгэн гадаргуутай талбайд зохиогддог Уимблидон тэмцээн эхэлж байна. Их дуулга тэмцээн нь эрэгтэй, эмэгтэй ганцаарчилсан, эрэгтэй, эмэгтэй хос, холимог хос, тэргэнцэртэй болон өсвөрийн гэсэн төрлүүдэд зохион байгуулагддаг.

Дэлхий нийтийг хамарсан ковид цар тахлын улмаас өнгөрсөн оны Уимблидон зохиогдоогүй бөгөөд дэлхийн I, II дайнаас хойш анх удаагаа энх цагт завсарлаад энэ жил эргэн ирлээ. Энэ жилийн тэмцээний ганцаарчилсан төрөлд Р.Надал, Д.Дим, М.Раонич, С.Ватринка нараас бусад бүх шилдэг теннисчид өрсөлдөж байгаа бол эмэгтэй ганцаарчилсан төрөлд Н.Осака, С.Халеп нараас бусад энэ цаг үеийн шилдэг теннисчид өрсөлдөж байна.

Тэмцээний шагналын сан 35 сая паунт бөгөөд ганцаарчилсан төрөлд түрүүлсэн теннисчин 1.7 сая паунтын шагнал хүртэнэ. Уимблидон тэмцээн нь Их дуулга тэмцээнүүдээс хамгийн эртнийх бөгөөд 1877 онд анх зохиогдож байсан. Тэмцээн өнөөдөр эхлэж байгаа бөгөөд ирэх долоо хоногийн ням гарагт өндөрлөнө.