НЭМГ: Хоёр сартай нярайд давтан шинжилгээ хийхэд сөрөг гарсан, охины гэр бүлийнхэн бүгд халдвартай байсан

Хоёр сартай нярай халдварын улмаас амиа алдсан мэдээллийн талаар Нийслэлийн эрүүл мэндийн газраас мэдээлэл хийлээ.

НЭМГ: "ХУД-ийн наймдугаар хороонд 2021 оны зургадугаар сарын 25-ны өглөө харамсалтай тохиолдол боллоо. Ц.С нь дөрөвдүгээр сарын 19-ны өдөр өргөө амаржих газарт төрсөн. Тухайн үед ээж нь ихэс ховхролтой байсан учир кесарь хагалгаагаар төрж, дутуу төрөлттэй байсан. Айлын дөрөв дэхь охин хүүхэд байсан. Ам бүл зургуулаа бөгөөд, аавынх нь тухайд ганцаараа Хятад вакцин хийлгэсэн. Бусад нь хийлгээгүй байсан. Энэ сарын 25-ны өдөр Түргэн тусламжийн төвд хүүхэд амьсгалахгүй байна гэх дуудлага ирсэн. Очиход хүүхэд амьсгалахгүй, ил харагдах шарх сорвигүй, хөшилтийн байдалтай нас барсан байсан. Хүүхдийн ээж нь энэ сарын 10-нд коронавирусээр батлагдсан. Нярайд давтан шинжилгээ хийхэд хоёр удаа сөрөг гарсан. Ингээд  22-нд нярайн ээж амьсгаадах, халуурах ийм шинж тэмдэг илэрсэн учраас эмнэлэгт хэвтүүлэхээр Ачтан эмнэлэгт хүргэхэд, тухайн эмнэлэгт хөхүүл хүүхдийг авахгүй гээд буцаасан. Сэргээн засах клиник гэр бүлээр нь эмчлэх боломжтой гэсэн. Харин тухайн гэр бүлийн тухайд бид хөнгөн учраас гэртээ байя, эхнэрийг маань эмнэлэгт хэвтүүл гэсэн. Ингээд эхнэрийг нь ХУД-ийн нэгдсэн эмнэлэгт хэвтүүлсэн. Тэрнээс хойш энэ сарын 21-нд ӨЭМТ-өөс нярайг очиж үзсэн байдаг.  ӨЭМТ-өөс үзэхэд хүүхдийн бие хэвийн байсан. Тухайн өдрөө түргэвчилсэн шинжилгээгээр хариу нь сөрөг гарсан.Мөн 24-ны өдөр ӨЭМТ-өөс халдвартай хүмүүст эм тараахад, хүүхэд маань эгчийнхээ өвөр дээр тоглож инээгээд байж байсан. Нярай маань коронавирусын өвчтэй иргэний ойрын хавьтал. Хүүхдийн эндэгдэл гарахад эмгэг судлалын төвтэй хамтарч эмгэг судлалын шинжилгээ хийдэг. Энэ хүрээнд ХУД-ийн эмгэг судлалын төвд хандахад халдвартайн улмаас бид хүлээн авахгүй, ШШҮХ-д ханд гэдэг хариу  ирүүлсэн. ШШҮХ-д хандахад ковидтой учраас бид задланд орохгүй гэдэг хариу өгсөн. Ингээд нярайн цогцосыг Буян компанид хүлээлгэн өгсөн" гэв.