Г.Буянбат: Намайг ухаан алдсан, нас барсан гэх мэдээлэл гарсан гэдгийг дараа нь мэдсэн

Ерөнхийлөгчийн тангараг өргөх ёслолын ажиллагаа өчигдөр /2021.06.25/ болсон. Төв талбай дээр тангараг өргөх ёслолд зориулж, цэргийн хүрээний анги байгууллагууд ёслол хүндэтгэлийн арга хэмжээ зохион байгуулсан. 

Энэ үеэр тухайн ёслол хүндэтгэлийн арга хэмжээнд оролцсон алба хаагч ухаан алдаж унаж, нас барсан гэх мэдээллүүд цахим орчинд эрчимтэй түгээд байгаа билээ. Харин уг асуудлаар ХХЕГ-аас энэ мэдээллийг худал болохыг мэдэгдээд, ёслолын үеэр нэг ч алба хаагч амиа алдаагүй гэх анхааруулга мэдэгдлийг гаргаад байсан. 

Тэгвэл "ухаан алдсан", "амиа алдсан" гэгдээд буй ахлагч цолтой Г.Буянбатаас мэдээллийн eguur.mn сайт тодруулга авчээ.

Эгүүр сайтад өгсөн тодруулгадаа Алба хаагч Г.Буянбат : "Талбай дээр Ерөнхийлөгч гарч ирээгүй байтал төрөх өдрөө хүлээж буй эхнэр маань  утасдаж, "төрөх гээд байна, хайраа" гэж ярихад нь сандарсандаа утсаа газар унагасан. Утасны  батерей  салж унасан учир, доош суугаад утсаа бөөгнүүлж авсан. Дээшээ боссоны дараа Ерөнхийлөгч гарч ирээд үгээ хэлж, арга хэмжээ өндөрлөсөн. Ёслолын дараа эхнэр дээрээ очиж, Өргөө амаржих газарт эхнэрээ хүргэж өгөөд, эхнэр маань хөөрхөн хүү төрүүлж өгсөн.Одоо би эхнэртээ хоол, цай зөөгөөд явж байна. Намайг ухаан алдсан гэх мэдээллийг дараа нь сонссон.Миний таньдаг хүмүүс над руу залгаад, биеийн байдлыг асуухад л тийм мэдээлэл гарсан гэдгийг мэдсэн. Тухайн мэдээллийг хараад гайхсан" гэжээ.