У.Хүрэлсүх: Хүн засагладаггүй, хууль засагладаг төртэй байлгахын тулд хичээн ажиллана

Шинэ сонгогдсон Ерөнхийлөгч Ухнаагийн Хүрэлсүхийн Монгол Улсын Ерөнхийлөгчийн тангараг өргөх өдөр, цагийг  2021 оны зургаадугаар сарын 25-ны өдрийн 11 цаг 40 минутад байхаар тогтоож, Улсын Их Хурал тогтоол баталсан билээ. Дөнгөж сая У.Хүрэлсүх тамгаа гардаж, тангарагаа өргөлөө.

Ерөнхийлөгч У.Хүрэлсүх:Эрхэм хүндэт ард иргэд, элэг нэгт ахан дүүс ээ. Миний бие бүрэн эрхт, бүтэн заяат Монгол Улсынхаа өндөр сэнтийг түшиж, эрх үүргээ шударгаар сахин биелүүлэхээ андгайлж, тангарагаа өргөлөө. Эгэл жирийн жолоочийн гэр бүлд өссөн надад Монгол төрийг тэргүүлэх их хувь заяаг оноосон эрхэм хүндэт ард иргэд, сонгогч түмэндээ гүн талархал илэрхийлэн, мэхийн ёсолъё. Намайг төрүүлж, өсгөж хүмүүжүүлсэн, бурхны орноос харж буй аав, ээждээ, өвөг дээдэстээ мэхийн  Миний бие үндэсний эв нэгдлээ сахин хамгаалах ард түмний асар их захиа даалгаврыг хүлээн авч байна. Энэ сонгуульд надтай хамт нэр дэвшин өрсөлдсөн С.Эрдэнэ, Д.Энхбат нарт амжилт хүсье. Мөн Х.Баттулга танд гүн хүндэтгэл үзүүлж, эрүүл энх, аз жаргал сайн сайхан бүхнийг хүсэн ерөөе. Хүмүүс эрх чөлөөтэй, хүсэл тэмүүлэлтэй, сэтгэл хангалуун амьдардаг нийгэм байгуулах гэж ард түмэн хүсч бас шахаж шаардаж байна. Хараат бус шударга шүүхийн байгууллагатай байх нь үүний үндэс. Зөвхөн хууль дээдэлдэг, хуульд захирагддаг тогтолцоог бий болгох нь чухал байна. Хүн засагладаггүй, хууль засагладаг төртэй байлгахын тулд хичээн ажиллана. Ядарсныг нь хайрладаг, задарсныг нь засагладаг байх нь Монгол төр юм. Байгалийн баялгаа адил тэгш хүртэх нь мөн чухал шаардлага болжээ. Төрийн бодлогыг тодорхойлж, үр өгөөжийг үндэсний баялгийн санд төвлөрүүлэн, эх орноо үйлдвэрлэгч улс болгохын төлөө ажиллана. Ард түмний минь хүсэл тэмүүлэл, төрийн тэргүүн миний байр суурийн үр шимийг манай ард түмэн хүртэнэ гэдэгт итгэж байна. Харин байгалийн баялаг бол дундардаг баялаг, манай ард түмний оюун санаа бол ундардаг баялаг гэдгийг санах хэрэгтэй. Бидний энэ баялаг бол монголчууд бид монголоороо үлдэх, монголоороо бахархахын үндэс суурь болох юм. Хамгийн том баялаг бол "Монгол хүн та өөрөө" юм. Иймд дэлхийд өрсөлдөх чадвартай монгол хүнийг хөгжүүлэх, ёс заншлаа сурталчилах ажилд төрийн бодлогыг чиглүүлэн ажиллана гэв.