Б.Энхбаяр:Ковидын хуулиа сунгахгүй бол төрийн албанд томилогдсон хүмүүс долдугаар сарын 01-нд чөлөөлөгдөнө

УИХ-ын чуулганы нэгдсэн хуралдаан яг одоо болж байна. 

Хуралдаанд УИХ-ын гишүүн С.Одонтуяа: Өнөөдөр халдварын улмаас 479 иргэн амиа алдсан гэсэн харамсалтай мэдээгээр чуулган эхэлж байна. Нас барсан хүмүүсийн ар гэрт АН-ын бүлгийн зүгээс болон нийт гишүүдийнхээ өмнөөс эмгэнэл илэрхийлье. Өнөөдөр маш олон хүүхэд өнчирч, олон хүн аав ээжээ алдаж, жирэмсэн ээжүүд үхэлтэй тэмцэж байна. Коронагийн хууль үр дүнгээ өгсөнгүй. Та нар ах дүү хамаатан садангаа тавихын тулд ажлаа мэддэг олон хүнийг коронагийн хуулиар далимдуулж халсан. ЭМДС-аа цөлмөх гэж байгаагаа зогсоох ёстой. Өнөөдөр гэрээр эмчлүүлж буй иргэдийнхээ эм, эмчилгээний мөнгийг энэ сангаас олгомоор байна.

Шадар сайд С.Амарсайхан: Хүний эрхийг зөрчиж байгаа мэт ийм асуудал зарим гишүүд ярьж болохгүй. Энэ бол туйлын буруу. НҮБ-аас гаргаж буй журмын дагуу манай улсын эрүүл мэндийн салбар ажиллаж байна. Хаана, хэний ч өмнө яаж ч хичээсэн байх хэмжээний цар тахал дунд бид амьдарч байна. Цар тахлын хуулийг сунгахгүй бол иргэдийнхээ амь насыг аврахгүй гэж хэлсэнтэй ялгаагүй ийм зүйл бий болчихоод байна.

ЭМ-ийн сайд С.Энхболд: Эрүүл мэндийн салбар цар тахлын үед бүх чадлаараа ажиллаж байна. Дан ганц өрхийн эмнэлэг гэлтгүй нэгдсэн эмнэлэг, лавлагаа шатлал гээд бүх шатанд ажиллаж байна. ЭМ-ийн салбараас маш олон ажлын хэсэг гарсан. Үүний нэг нь эмнэлзүйн баг байгаа. Тэд 24 цагаар ажиллаж байна. Ялангуяа өрхийн эмнэлгийн тусламж үйлчилгээг өдрийн тарифт эмчилгээний санхүүжилтийг 70 мянган төгрөг байсныг нэмэгдүүлж 160 мянга болгож өөрчилж байна. Үүнд өрхийн эмнэлгийн эмч нарын бүх урсгал зардал шингэсэн. Цар тахал гэдгийг эрхэм гишүүд минь та бүхэн ойлгох хэрэгтэй. Манай улсад дельта вирус, хоруу чанартайгаар маш хурдацтай тархаж байна.  

УИХ-ын гишүүн Б.Энхбаяр: Ковидын хуулийг сунгахын цаад учир бол төрийн албанд маш олон хүн томилсон. Хуулийн үр дүнд баахан түр даргатай болсон. Сунгахгүй бол энэ хүмүүс долдугаар сарын 01-нд чөлөөлөгдөнө. Өнгөрсөн хугацаанд хэдэн хүн шалгалт өгөхгүй түр томилогдсон юм бэ. 

Шадар сайд С.Амарсайхан: Хэдэн хүнийг ажилд томилох гээд байгаа зүйл биш. Цар тахалтай тэмцэхэд аливаа саадыг арилгаж, хүндрэлтэй нөхцөл байдлыг зохицуулахад л гээд байгаа юм. Хүн томилох нь тусдаа асуудал.