Ардын хувьсгалын 100 жилийн ойн хүндэт медаль ширхэгийг 15000 төгрөгөөр хийлгэж 150 мянган хүнд тараана

Төрийн байгуулалтын байнгын хорооны хуралдаанаар Ардын хувьсгалын 100 жилийн ойн хүндэт медаль бий болгох тухай тогтоолын төслийн анхны хэлэлцүүлгийг өнөөдөр /2021.06.23/ хийсэн. Энэ үеэр гишүүдийн асуусан асуулт болон медалийн эх загварыг гаргасан компанийн өгсөн мэдээллээс товчлон хүргэж байна.

Ардын хувьсгалын 100 жилийн ойн хүндэт медалийн загвар шалгаруулах уралдаан зарлаж, ирүүлсэн загваруудыг Засгийн газрын хуралдаанаар хоёр удаа хэлэлцээд загварыг шалгаруулж баталжээ. Медаль нь зүүлт, медаль гэсэн хоёр хэсгээс бүрдэж байгаа юм байна. Медалийн эх загварийг  “Роял групп компани" гаргажээ.

Энэхүү хүндэт медальд  нэг тэрбум төгрөг зарцуулах бөгөөд нэг ширхгийг 15000 төгрөгөөр тооцож 150 мянган хүнд гардуулах аж. Хүндэт медалийг Монгол Улсын Ерөнхийлөгчийн зарлигаар олгохоор төсөлд тусгасан байна.