Олон Улсын Олимпийн өдөр тохиож байна

Олон Улсын Олимпийн өдөр өнөөдөр /2021.06.23/ тохиож байна. Өдгөөгөөс 127 жилийн өмнө буюу 1894 оны 6 сарын 23-ны өдөр Франц улсын нийслэл Парис хотноо Францын Пьер де Кубертен тэргүүтэй эрхмүүд эртний олимпийг дахин сэргээн орчин цагийн олимпийн наадмын хөдөлгөөнийг эхлүүлэх зорилгоор Олон улсын олимпийн хороог байгуулан, анхдугаар чуулганыг хийсэн байдаг.

Францын сэхээтэн Пьер де Кубертен, Грекийн бизнесмен Д.Викелас нарын эрхмүүдийн эхлүүлсэн олимпийн хөдөлгөөн ажил хэрэг болж дэлхийн таван тивийн улс үндэстэн, ард түмнүүдийг спортоор нөхөрлүүлэн, энхтайванчаар, хамтын ажиллагааны үйлсийг хөгжүүлээд байна.

Олон улсын олимпийн өдрийг албан ёсоор 1948 оноос тэмдэглэж эхэлсэн. 1947 онд Шведийн Стокгольм хотноо болсон ОУ-ын олимпийн хорооны 41-р чуулганд тухайн үеийн Чехословак улсын төлөөлөл Йозеф Грусс анх ОУ-ын олимпийн өдрийг тэмдэглэх санааг танилцуулсан бол 1948 онд Швейцарын Санкт-Мориц хотноо болсон ОУ-ын олимпийн хорооны 42-р чуулганаар албажин орчин цагийн олимпийн хөдөлгөөн эхэлсэн 6 сарын 23-ны өдрийг жил бүр “Олон Улсын Олимпийн Өдөр” болгон тэмдэглэх шийдвэр гарсан.

Монгол улсын Үндэсний олимпийн хороо 1956 онд байгуулагдан 1962 оны 6 сард ОУ-ын Олимпийн хороонд гишүүнээр элсэн олимпийн хөдөлгөөнд албан ёсоор нэгдэн орсон. Монголын баг тамирчид 1964 оны Австрийн Инсбрукт болсон өвлийн олимпийн наадамд анх удаагаа оролцсон байдаг. Тэр цагаас хойш өвлийн 14, зуны 13 олимпийн наадамд баг, тамирчдаа оролцуулаад байна.