ЗГ: Зарим ААН-үүдийн үйл ажиллагааг нээх эсэхийг шийдвэрлэнэ

Засгийн газрын ээлжит хуралдаан үргэлжилж байна. Лхагва гаригийн хуралдаан бүрээр коронавирусийн нөхцөл байдал болон “Эрүүл мэндээ хамгаалж, эдийн засгаа сэргээх 10 их наядын цогц төлөвлөгөө”-ний хэрэгжилтийн талаар сонсдог. Үүнээс цаг үеийн шинжтэй 20 гаруй асуудал хэлэлцэхээр төлөвлөжээ.

Хоол үйлдвэрлэл, үйлчилгээний газрыг 2021 оны зургадугаар сарын 17-ны өдрөөс эхлэн долоо хоногийн хугацаатай заалаар үйлчлэхийг хориглож, амралт жуулчны баазын үйл ажиллагааг энэ сарын 17-ны өдрөөс долоо хоног хязгаарласан. 

Тэгвэл өнөөдөр /2021.06.23/ Засгийн газрын ээлжит хуралдаанаар дээрх үйлчилгээний байгууллагуудын үйл ажиллагааг хэвийн явуулах эсэхийг хэлэлцэн, шийдвэрлэнэ.

Өнгөрсөн өдрүүдэд халдварын тоо буураагүй учраас дээрх арга хэмжээг үргэлжлүүлнэ гэсэн мэдээлэл байна. Өчигдөр нийт  11765 хүнд шинжилгээ хийхэд  2231  хүнээс халдвар илэрч, нийт батлагдсан тохиолдлын тоо 98050 болсон. Зарим аймагт халдвар тархалт огцом нэмэгдэж байгаатай холбогдуулан хөл хорио тавиад байгаа билээ.