Архангай аймагт хөл хорио тогтоох саналыг УОК-т хүргүүлжээ

Зургадугаар сарын 22-ны өдрийн байдлаар Архангай аймагт нийт 1060 тохиолдол бүртгэгдэж, сүүлийн өдрүүдэд халдварын эрсдэл огцом нэмэгдсэн. Энэ нь нийт тохиолдлын 47,8 хувийг эзэлж байгаа бөгөөд нийт 35 кластер голомтод халдвар тархаад байгаа аж.

Нөхцөл байдалтай холбогдуулан мэргэжлийн байгууллагууд хөл хорио тогтоох дүгнэлт гаргаж, дүгнэлтийг үндэслэн аймгийн Засаг дарга Д.Золжаргал Улсын Онцгой комисст санал хүргүүлжээ.

Саналд: "Цаашид нөхцөл байдал хүндэрвэл эмнэлгийн байгууллагын даац чадамжаас хэтэрч, хүний амь нас эрсдэх нөхцөлд хүрч болзошгүй байгаа тул Архангай аймгийн хэмжээнд бүх нийтийн бэлэн байдлын зэрэгт нэн даруй шилжүүлэх саналтай байна" гэжээ.

Мөн Архангай аймгийн Засаг дарга Д.Золжаргал ард иргэддээ хандан уриалга хүргүүлжээ. Тэрбээр: -Иргэд та бүхэн мэргэжлийн байгууллагуудын заавар зөвлөмжийг даган, халдвар хамгааллын дэглэмээ чанд сахиж, өөрийгөө болон хайртай гэр бүл, энхрий бяцхан үрсээ аюулт цар тахлын халдвараас урьдчилан сэргийлэхийг хувиасаа болон Аймгийн Онцгой комиссын нийт бие бүрэлдэхүүний өмнөөс уриалж байна.

Бид өмнө нь ийм нөхцөл байдалд ажиллаж, амьдарч байгаагүй хүндхэн цаг үетэй нүүр тулж байгаа хэдий ч жижиг дунд бизнес эрхлэгчид болон ард иргэдийнхээ эдийн засгийн нөхцөл байдлыг хүндрүүлэхгүй байх бүхий л талд анхааран ажиллахыг хичээж байна. Гэвч мэргэжлийн байгууллагуудын заавар зөвлөмж, тандалт судалгааг үндэслэн зарим үйл ажиллагааг хориглох шийдвэр гарган, ард иргэдээ халдварт өвчнөөс сэргийлэн тухай бүр хариу арга хэмжээ аван ажиллаж байна. Иймээс иргэн бүр хариуцлагатай байж, аймаг сумдын онцгой комиссын гаргасан шийдвэрийг хэрэгжүүлэн, аюулт цар тахлыг хамтдаа даван туулахыг дахин дахин уриалж байгааг минь хүлээн авна уу. Ковид-19 Халдварыг бууруулахад иргэдийн оролцоо нэн чухал" гэсэн байна.